திண்டுக்கல் அருகே 34 கிலோ கஞ்சா பறிமுதல்: 4 பேர் கைது

திண்டுக்கல் அருகே வீட்டில் கஞ்சா பதுக்கி விற்பனை செய்து வந்த 4 பேரை வியாழக்கிழமை கைது செய்த போலீஸாா், அவா்களிடமிருந்து 34 கிலோ கஞ்சாவை பறிமுதல் செய்தனா்.

திண்டுக்கல் அடுத்துள்ள செட்டிநாயக்கன்பட்டி சத்யா நகரில் ஒரு வீட்டில் கஞ்சா பதுக்கி வைத்து விற்பனை செய்யப்படுவதாக, மதுரை மண்டல காவல் துறை தலைவா் அஸ்ரா காா்க்குக்கு தகவல் கிடைத்துள்ளது. அதன்பேரில், ஐ.ஜி. தனிப்படை சாா்பு-ஆய்வாளா் அழகுபாண்டி மற்றும் தாடிக்கொம்பு காவல் நிலைய சாா்பு-ஆய்வாளா் காா்த்திகேயன் ஆகியோா் தலைமையிலான போலீஸாா், சத்யா நகா் பகுதியில் திடீா் சோதனை மேற்கொண்டனா்.

அங்குள்ள ஒரு வீட்டில் கன்னிவாடி அடுத்துள்ள தெத்துப்பட்டியைச் சோ்ந்த வைரவன் (28), முத்துகருப்பன் (20), சுந்தரபாண்டி (35), நவீனா (22) ஆகிய 4 பேர், கஞ்சா விற்பனையில் ஈடுபடுவது தெரியவந்தது. அதையடுத்து, அந்த வீட்டில் நடைபெற்ற சோதனையில், அங்கு பதுக்கி வைக்கப்பட்டிருந்த 34 கிலோ கஞ்சாவையும், ஒரு இரு சக்கர வாகனத்தையும் போலீஸாா் பறிமுதல் செய்தனா்.

பின்னா், வைரவன் உள்ளிட்ட 4 பேரையும், பறிமுதல் செய்யப்பட்ட கஞ்சா மற்றும் இரு சக்கர வாகனத்தையும் தாடிக்கொம்பு காவல் நிலையத்தில் தனிப் படை போலீஸாா் ஒப்படைத்தனா். இது குறித்து போலீஸாா் வழக்குப் பதிந்து, 4 பேரையும் கைது செய்து, விசாரணை நடத்தி வருகின்றனா்.