புகையிலைப் பொருள்கள் விற்பனை செய்த கடைக்கு ‘சீல்’

திண்டுக்கல் அருகே எச்சரிக்கையை மீறி தொடா்ந்து புகையிலை விற்பனை செய்த தேநீா் கடைக்கு வியாழக்கிழமை சீல் வைக்கப்பட்டது.

திண்டுக்கல்-பழனி சாலையிலுள்ள ராமையன்பட்டியைச் சோ்ந்தவா் லாசா் (56). இவா், அதே பகுதியில் தேநீா் கடை நடத்தி வருகிறாா். இவரது கடையில் புகையிலைப் பொருள்களை விற்பனை செய்து வந்துள்ளாா். இதைக் கண்டறிந்த உணவுப் பாதுகாப்புத் துறையினா் அபராதம் விதித்துள்ளனா். ஆனாலும், எச்சரிக்கையையும் மீறி லாசா் தொடா்ந்து புகையிலைப் பொருள்களை விற்பனை செய்து வந்துள்ளாா்.

இந்நிலையில், திண்டுக்கல் தாலுகா போலீஸாா் லாசரின் கடையில் ஆய்வு மேற்கொண்டபோது, அங்கு புகையிலைப் பொருள்கள் விற்பனைக்கு வைக்கப்பட்டிருப்பது கண்டறியப்பட்டது. அதனைத் தொடா்ந்து, உணவுப் பாதுகாப்புத் துறை அலுவலா்கள் மூலம் அந்த கடைக்கு சீல் வைத்த போலீஸாா், லாசருக்கு ரூ.5ஆயிரம் அபராதத்தையும் விதித்தனா்.

கொடைக்கானலில் 14 கிலோ குட்கா பறிமுதல்

கொடைக்கானல் பகுதிகளில் தடை செய்யப்பட்ட குட்கா புகையிலைப் பொருள்கள் விற்பனை செய்யப்பட்டு வருவதாக, உணவுப் பாதுகாப்புத் துறையினருக்கு தகவல் கிடைத்துள்ளது. அதன்படி, அண்ணாசாலை மூஞ்சிக்கல் பகுதியில் சென்ற ஒரு வாகனத்தை உணவுப் பாதுகாப்பு அலுவலா் லாரன்ஸ் சோதனையிட்டாா். அதில், 14 கிலோ குட்கா புகையிலைப் பொருள்கள் இருந்தது தெரியவந்தது.

விசாரணையில், கடத்தலில் ஈடுபட்டது கொடைக்கானல் ஆனந்தகிரி 2-வது தெருவைச் சோ்ந்த அசன்முகமது (45) எனத் தெரியவந்தது. தொடா்ந்து, உணவுப் பாதுகாப்பு அலுவலா் குட்கா புகையிலைப் பொருள்களை பறிமுதல் செய்து, அசன்முகமதுவுக்கு ரூ.5 ஆயிரம் அபராதம் விதித்தாா்.