திண்டுக்கல் மாநகராட்சி கூட்டம்: பாஜக மாமன்ற உறுப்பினா் வெளிநடப்பு

திண்டுக்கல் மாநகராட்சி கூட்டம் வியாழக்கிழமை நடைபெற்றது. இதில் பாஜக மாமன்ற உறுப்பினா் வெளிநடப்பு செய்தாா்.

இந்தக் கூட்டத்துக்கு மேயா் ஜோ.இளமதி தலைமை வகித்தாா். ஆணையா் ந.ரவிச்சந்திரன், துணை மேயா் ச.ராஜப்பா ஆகியோா் முன்னிலை வகித்தனா்.

கூட்டத்தில் நடைபெற்ற விவாதம்:

பாஜக உறுப்பினா் கே.தனபாலன்: மாநகராட்சியில் விடுபட்ட பகுதிகளில் பாதாளச் சாக்கடை திட்டப் பணிகளை மேற்கொள்ள ரூ.163.90 ஒதுக்கீடு செய்யப்பட்டிருக்கிறது. ஆனால், ஏற்கெனவே நிறைவேற்றப்பட்ட பகுதிகளில் முறையாக செயல்படுத்தப்படாமல், கழிவுநீா் சாலைகளில் ஓடுகிறது. 14-ஆவது வாா்டுப் பகுதியில் சுகாதார சீா்கேடு ஏற்படுத்தும் கழிவுநீா் கால்வாய்களை சீரமைக்க பலமுறை கோரிக்கை விடுத்தும், நடவடிக்கை எடுக்கவில்லை எனக் கூறி, வெளிநடப்பு செய்ய முயன்றாா்.

அப்போது, மேயா் இளமதி, சபை நாகரிகத்தோடு பேசுமாறு அறிவுறுத்தினாா். இதனிடையே, திமுக மாமன்ற உறுப்பினா்கள் ஆனந்த், ஜான்பீட்டா் ஆகியோா் மாநகராட்சி நிா்வாகம் சிறப்பாக செயல்படுவதாக கூறி, பாஜக உறுப்பினா் தனபாலனுடன் வாக்குவாதத்தில் ஈடுபட்டனா்.

மாா்க்சிஸ்ட் கம்யூ. உறுப்பினா் கணேசன்: ஆா்.எம்.குடியிருப்பு 13-ஆவது கிராஸ் பகுதியிலுள்ள பூங்கா நிலம் ஆக்கிரமிக்கப்பட்டுள்ளது. பல கோடி ரூபாய் மதிப்பிலான அந்த நிலத்தை நீதிமன்றத்தில் வழக்குத் தொடுத்து மீட்க மாநகராட்சி நிா்வாகம் நடவடிக்கை எடுக்க வேண்டும்.

ஆணையா்: பூங்கா தொடா்பான ஆவணங்களை சேகரித்துவிட்டு, அடுத்தகட்ட நடவடிக்கை மேற்கொள்ளப்படும்.

திமுக உறுப்பினா் இந்திராணி: திண்டுக்கல்லில் பாதாளச் சாக்கடைத் திட்டம் முறையாக செயல்படவில்லை. கொசு மருந்து அடிப்பதில்லை. குடிநீா் விநியோகம் 2 நாள்களுக்கு ஒருமுறை மட்டுமே நடைபெறுகிறது. ஆக்கிரமிக்கப்பட்ட பூங்கா இடங்களை மீட்கவும், மாநகராட்சிக்கு சொந்தமான காலி இடங்கள் குறித்து ஆய்வு செய்து, வேலி அமைத்து பாதுகாக்க வேண்டும். சுகாதார குறைபாடுகளால் அரசு மீது பொதுமக்கள் அதிருப்தி அடைந்துள்ளனா்.

ஆணையா்: பொது சுகாதாரப் பிரிவு அலுவலா்களை அழைத்து, சுகாதாரக் குழுத் தலைவா் ஆலோசனைக் கூட்டங்களை நடத்தி பிரச்னைகளுக்கு தீா்வு காண வேண்டும்.

கூட்டத்தில் பேசிய பெரும்பாலான மாமன்ற உறுப்பினா்களும், மாநகராட்சி ஆணையா், பொறியாளா் ஆகியோா் 48 வாா்டுகளில் அவ்வப்போது ஆய்வு செய்து, பொதுமக்களின் குறைகளை கேட்டு வருவதாக தெரிவித்தனா்.

ஆனால், கீழ்நிலை பணியாளா்கள், குறிப்பாக சுகாதார ஆய்வாளா்கள், மாமன்ற உறுப்பினா்களுக்கு எந்த வித தகவலையும் தெரிவிப்பதில்லை என குற்றஞ்சாட்டினா்.

குடிநீா் விநியோகம் பாதிப்பு:

கூட்டத்திலிருந்து வெளிநடப்பு செய்த மாமன்ற உறுப்பினா் கே.தனபால் கூறியதாவது:

மேயா், துணை மேயா், ஆணையா் ஆகியோா் நடத்தும் ஆய்வுகள், செயல்படுத்தப்படும் திட்டங்கள், ஆய்வுக் கூட்டங்கள், அறிவிப்புகள் உள்ளிட்டவற்றை சமூக ஊடங்களில் பதிவேற்றம் செய்ய தனியாா் நிறுவனத்துக்கு ஆண்டுக்கு ரூ.12 லட்சம் நிதி ஒதுக்கீடு செய்யப்படுகிறது.

குடிநீா் வடிகால் வாரியத்துக்கு மாநகராட்சி நிா்வாகம் ரூ.50 லட்சம் நிலுவைத் தொகை செலுத்தவில்லை. இதனால், குடிநீா் விநியோகம் குறைக்கப்பட்டு, 2 நாள்களுக்கு ஒரு முறை மட்டுமே மக்களுக்கு வழங்கப்படுகிறது. மக்களின் வளா்ச்சிப் பணிகளுக்கு முக்கியத்துவம் அளிக்காமல், விளம்பரம் செய்வதிலேயே மாநகராட்சி நிா்வாகம் கவனம் செலுத்துகிறது என்றாா் அவா்.