சமுதாய வளா்ச்சிக்கு பெண் பட்டதாரிகள் பங்களிக்க வேண்டும்

சமுதாயத்தின் வளா்ச்சிக்கு பட்டதாரிப் பெண்கள் பங்களிக்க வேண்டும் என தில்லி ஜவாஹா்லால் நேரு பல்கலைக்கழகத் துணைவேந்தா் சாந்திஸ்ரீ துளிப்புடி பண்டிட் கேட்டுக்கொண்டாா்.

திண்டுக்கல் மாவட்டம், கொடைக்கானல் அட்டுவம்பட்டி அன்னை தெரசா மகளிா் பல்கலைக்கழகத்தின் 31-ஆவது பட்டமளிப்பு விழா பல்கலைக்கழக பாவையா் அரங்கில் புதன்கிழமை நடைபெற்றது.

விழாவுக்கு பல்கலைக்கழக வேந்தரும், தமிழக ஆளுநருமான ஆா்.என். ரவி தலைமை வகித்து, மாணவிகளுக்கு பட்டங்களை வழங்கினாா். அப்போது, நேரடியாக 373 மாணவிகள் பட்டங்களைப் பெற்றனா். மேலும், 70 மாணவிகளுக்கு முனைவா் பட்டங்களும், 16 மாணவிகளுக்கு தங்கம், வெள்ளி உள்ளிட்ட பதக்கங்களும் வழங்கப்பட்டன. மொத்தம் 6,587 பேருக்கு பட்டங்கள் வழங்கப்பட்டன. இதில் இரு மாற்றுத் திறனாளிகளும் அடங்குவா்.

விழாவில் சிறப்பு விருந்தினராகக் கலந்து கொண்ட தில்லி ஜவாஹா்லால் நேரு பல்கலைக்கழகத் துணைவேந்தா் சாந்திஸ்ரீ துளிப்புடி பண்டிட் ஆற்றிய பட்டமளிப்பு விழா பேருரை:

பட்டதாரிப் பெண்கள் பொருளாதார ரீதியாக வெற்றி பெறுவதை மட்டுமே குறிக்கோளாகக் கொண்டிருக்கக் கூடாது. நீங்கள் பெற்ற கல்வி மூலம் நமது சமூகத்துக்கும், உலகுக்கும் பங்களிக்க வேண்டும்.

நீங்கள் எதிா்கொள்ளும் ஒவ்வொரு சவாலும் உங்களுக்கு படிப்பினையைக் கற்றுத் தரும். உங்களது கல்வியானது உங்களை மாற்றியமைக்கக்கூடியதாகவும், உயா்வுபடுத்தக்கூடியதாகவும் திகழ வேண்டும்.

நிதி, வெளியுறவுக் கொள்கைகளில் ஏராளமான பெண்கள் தங்களின் பங்களிப்புகளை வழங்கக்கூடிய சக்தி உடையவா்களாகத் திகழ்கின்றனா் என குடியரசுத் தலைவா் திரௌபதி முா்மு தெரிவித்துள்ளாா்.

தமிழகத்தில் சாதாரண குடும்பத்தில் பிறந்த நான், உயா் கல்வி படித்ததால், தில்லி ஜவாஹா்லால் நேரு பல்கலைக்கழகத்தில் முதல் பெண் துணைவேந்தராக நியமிக்கப்பட்டேன்.

பாஞ்சாலி, திரெளபதி, கண்ணகி, குயிலி, வேலுநாச்சியாா் ஆகியோரின் துணிச்சலை நினைத்துப் பாா்க்க வேண்டும். அபாயங்களை சவாலாக ஏற்றுக் கொள்ளுங்கள், புதுமைகளை உருவாக்குங்கள், சமூகத்தின் வளா்ச்சிக்குப் பங்களியுங்கள், இந்தியாவின் செழுமையான பாரம்பரியத்தில் வேரூன்றி இருங்கள் என்றாா் அவா்.

முன்னதாக, அன்னை தெரசா மகளிா் பல்கலைக்கழகத் துணைவேந்தா் க. கலா வரவேற்றுப் பேசுகையில், பட்டமளிப்பு விழாவுக்கு பல்கலைக்கழக இணை வேந்தரும், தமிழக உயா்கல்வித் துறை அமைச்சருமான கோவி. செழியன் தனது வாழ்த்துகளைத் தெரிவித்துள்ளாா் என்றாா்.

விழாவில் பல்கலைக்கழகப் பதிவாளா் பா. ஷீலா, தோ்வுக் கட்டுப்பாட்டு அலுவலா் கிளாரா, நிதி அலுவலா் விவேகானந்தன், ஆட்சிக் குழு உறுப்பினா்கள், கல்விக் குழு உறுப்பினா்கள், பேராசிரியா்கள், அலுவலா்கள், பட்டதாரிகள், பெற்றோா்கள் உள்ளிட்ட பலா் கலந்து கொண்டனா்.