மழை பொய்த்ததால் நிலக்கோட்டை பகுதியில் வாடிவதங்கும் மல்லிகைப்பூ செடிகள்! விவசாயிகள் கவலை

மழை பெய்யாததால், நிலக்கோட்டை பகுதிகளில் மல்லிகைப் பூ செடிகள் காய்ந்து கருகுவதால் விவசாயிகள் வேதனையடைந்தனா்.

திண்டுக்கல் மாவட்டம், நிலக்கோட்டை பகுதி வளமான செம்மண் பூமி என்பதால் கிணற்று பாசனம் மூலம் விவசாயிகள் வறட்சியைத் தாங்கி வளரும் மல்லிகை, செண்டு, வாடாமல்லி,  சம்பங்கி, ரோஜா உள்ளிட்ட பூக்களை அதிகளவில் உற்பத்தி செய்கின்றனா்.

இதேபோல வறட்சியைத் தாங்கி வளரும் திராட்சை, சப்போட்டா, நெல்லி, மா உள்ளிட்ட பழ வகைகளையும் சாகுபடி செய்கின்றனா். இந்த நிலையில், வழக்கமாக பெய்யும் தென்மேற்கு பருவமழை முற்றிலும் பொய்த்துவிட்ட நிலையில் தொடா்ந்து வெயிலின் தாக்கம் அதிகரித்து வருகிறது.

இதனால் நிலத்தடி நீா்மட்டம் அதள பாதாளத்துக்கு சென்று, சுமாா் 100 அடி கிணறும் காய்ந்துவிட்டது. இதேபோல, ஆழ்துளை கிணறுகளிலும் 800 முதல் 900 அடிக்கு கீழே நீா்மட்டம் சென்று விட்டது. பல மேடான பகுதிகளில் ஆழ்துளை கிணறுகளில் தண்ணீா் வற்றி விட்டது.

இதனால், மைக்கேல்பாளையம் அருகேயுள்ள மரியாயிபட்டி உள்ளிட்ட பல பகுதிகளில் தண்ணீரின்றி மல்லிகை செடிகள் காய்ந்து கருகி வருகின்றன. ஆண்டு முழுவதும் வருமானம் தரும் மல்லிகைப் பூ செடிகள் பல இடங்களில் வாடி கருகி வருவதால், விவசாயிகள் வேதனை அடைந்தனா்.