நம்பிக்கையில்லாத் தீா்மானத்தின் போது தவெக எம்எல்ஏக்களின் நிலை தெரியும்: திண்டுக்கல் சி.சீனிவாசன்

நம்பிக்கையில்லாத் தீா்மானம் கொண்டு வரும்போதுதான் தவெக சட்டப்பேரவை உறுப்பினா்களின் உண்மை நிலை தெரியும் என அதிமுக பொருளாளரும், முன்னாள் அமைச்சருமான திண்டுக்கல் சி.சீனிவாசன் தெரிவித்தாா்.

திண்டுக்கல் மாவட்ட அதிமுக அலுவலகத்தில் வெள்ளிக்கிழமை செய்தியாளா்களிடம் அவா் மேலும் கூறியதாவது:

கள்ளக்குறிச்சி மாவட்ட பெண் ஆட்சியருக்கு, அந்த தொகுதியின் சட்டப்பேரவை உறுப்பினா் அருள் விக்னேஷ் பாலியல் ரீதியாக குறுஞ்செய்தி அனுப்பிய விவகாரத்தில், அமைச்சா் ஒருவா் மட்டும் அதுபோன்ற எந்தச் சம்பவமும் நடைபெறவில்லை என மறுத்து வருகிறாா். விரைவில் உண்மை வெளிவரும்.

தமிழகத்தில் சட்டம்-ஒழுங்கு முற்றிலும் சீா்குலைந்திருக்கிறது. கொலை, கொள்ளை, பாலியல் குற்றங்கள், போதைப் பொருள் விற்பனையை தவெக அரசால் கட்டுக்குள் வைத்திருக்க முடியவில்லை. தமிழகத்தில் தொடா்ந்து கைதிகள் தப்பிச் செல்லும் நிகழ்வுகள் அரசின் நிா்வாகத் திறமையின்மையைக் காட்டுகிறது.

அதிமுகவும், திமுகவும் இணைந்து செயல்படுவதாக வெளியாகும் தகவல்கள் முற்றிலும் தவறானவை. அதிமுக தலைமையில் மீண்டும் வலுவான கூட்டணி அமைக்கப்பட்டு வருகிறது. ஆளுங்கட்சிக்கு எதிராக உள்ள 65 சதவீத வாக்குகளை ஒருங்கிணைத்து திமுகவை வீழ்த்துவதற்கான வியூகம் அமைக்கப்பட்டு வருகிறது. சட்டப்பேரவை இடைத்தோ்தலில் பொது வேட்பாளா் என்ற பேச்சுக்கே அதிமுகவில் இடமில்லை.

காங்கிரஸ் கட்சியின் மாநிலத் தலைவா் மாணிக்கம் தாகூா், தவெக அரசுக்கு தொடா்ந்து ஆதரவாகப் பேசிவரும் நிலையில், அதே கட்சியைச் சோ்ந்த மக்களவை உறுப்பினா் அரசுக்கு எதிராகக் கருத்துத் தெரிவித்து வருவது, அந்தக் கட்சிக்குள் குழப்பம் இருப்பதைக் காட்டுகிறது.

தமிழகத்தில் நிலவும் பிரச்னைகள் குறித்து முதல்வா் ஜோசப் விஜய் வெளிப்படையாகப் பேச வேண்டும்.

தவெக சட்டப்பேரவை உறுப்பினா்கள் மாற்றுக் கட்சிகளுக்குச் சென்றுவிடுவாா்கள் என்ற அச்சம் காரணமாகவே, முதல்வா் ஜோசப் விஜய் தலைமையில் பேரவை உறுப்பினா்கள் கூட்டம் நடத்தப்பட்டிருக்கிறது. எனினும், நம்பிக்கையில்லாத் தீா்மானம் கொண்டு வரும்போதுதான் உண்மை நிலை தெரியும் என்றாா் அவா்.