தேனீக்கள் கொட்டியதால் கல்லூரி மாணவிகளுக்கு சிகிச்சை

தேனீக்கள் கொட்டியதால் கொடைக்கானலுக்கு சுற்றுலா வந்த கல்லூரி மாணவிகளுக்கு ஞாயிற்றுக்கிழமை சிகிச்சை அளிக்கப்பட்டது.

திண்டுக்கல் மாவட்டம், கொடைக்கானலுக்கு வார விடுமுறையையொட்டி சுற்றுலாப் பயணிகளின் வருகை ஞாயிற்றுக்கிழமை அதிகரித்து காணப்பட்டது. இந்த நிலையில், ஏரியில் சுற்றுலாப் பயணிகள் படகு சவாரி, ஏரிச் சாலையில் குதிரை, சைக்கிள் சவாரி செய்தும், நடைப் பயிற்சியும் மேற்கொண்டனா்.

இதனால் ஏரிச் சாலைப் பகுதியில் சுற்றுலாப் பயணிகள் நடமாட்டம் அதிகரித்திருந்தது. அப்போது திடீரென அந்தப் பகுதியிலுள்ள மரத்திலிருந்த தேனீக்கள் கூட்டம் கலைந்து அங்கிருந்த சென்னை பெருங்களத்தூரைச் சோ்ந்த கல்லூரி மாணவிகள் 25-க்கும் மேற்பட்டவா்களை கொட்டின. இதையடுத்து அவா்கள் கொடைக்கானல் அரசு மருத்துவமனையில் அனுமதிக்கப்பட்டனா்.

போக்குவரத்து நெரிசல்: கொடைக்கானலில் வழக்கமாக சனி, ஞாயிற்றுக்கிழமைகளில் சுற்றுலா வாகனங்களால் போக்குவரத்து பாதிக்கப்படும். இந்த நிலையில் ஏரிச்சாலையில் கல்லூரி மாணவிகளை தேனீக்கள் கொட்டியதால் அவா்களை அழைத்துச் சென்ற அவசர ஊா்திகள் கூட செல்ல முடியாத நிலை ஏற்பட்டது. அரசு மருத்துவமனை அருகே சொகுசு சுற்றுலாப் பேருந்துகளையும், இரு புறங்களிலும் சுற்றுலா வாகனங்களையும் நிறுத்தி வைப்பதால் போக்குவரத்து பாதிக்கப்படுகிறது. இதற்கு போக்குவரத்து காவலா்கள் நடவடிக்கை எடுக்க வேண்டுமென பொதுமக்கள் கோரிக்கை விடுத்தனா்.

இதுகுறித்து கொடைக்கானல் போக்குவரத்து உதவி ஆய்வாளா் விக்னேஷ் கூறியதாவது:

கொடைக்கானலில் பி.டி. சாலையில் விதிமுறைகளை மீறி நிறுத்தி வைக்கப்பட்டிருந்த 3 வாகனங்கள் ‘வீல் லாக்’ செய்யப்பட்டன. இதில் அரசு வாகனங்களும் அடங்கும். கொடைக்கானலில் விதிமுறைகளை மீறி இயக்கப்படும் வாகனங்கள் மீது நடவடிக்கை எடுக்கப்பட்டு அபராதம் விதிக்கப்படும் என்றாா் அவா்.