போலி மருத்துவா் கைது

குஜிலியம்பாறை அருகே முறையாக மருத்துவம் பயிலாமல், நோயாளிகளுக்கு சிக்சை அளித்து வந்த போலி மருத்துவா் கைது செய்யப்பட்டாா்.

திண்டுக்கல் மாவட்டம், குஜிலியம்பாறை அடுத்த ஆலம்பாடி ஊராட்சிக்குள்பட்ட சத்திரப்பட்டி காந்திநகரைச் சோ்ந்தவா் செல்வராஜ் (65). இவா் முறையாக மருத்துவம் பயிலாமல், நோயாளிகளுக்கு சிகிச்சை அளித்து வருவதாகக் கிடைத்த தகவலின் பேரில், சத்திரப்பட்டியில் செவ்வாய்க்கிழமை இரவு சுகாதார இணை இயக்குநா் பாரதி ஆய்வு செய்தாா். அப்போது, செல்வராஜ் 12 -ஆம் வகுப்பு படித்துவிட்டு சிகிச்சை அளித்தது கண்டறியப்பட்டது. அவரது வீட்டிலிருந்து காலாவதியான கருக்கலைப்பு மாத்திரைகள், ஆங்கில வழி மருந்துகள் பறிமுதல் செய்யப்பட்டன. இதுகுறித்து இணை இயக்குநா் அளித்த புகாரின் பேரில், போலீஸாா் செல்வராஜை கைது செய்தனா்.