ராமேசுவரம்-மங்களூா் விரைவு ரயிலை இயக்க தெற்கு ரயில்வே முன்மொழிவு: எம்.பி. தகவல்

மதுரை: ராமேசுவரம் - மங்களூா் விரைவு ரயிலை இயக்க தெற்கு ரயில்வே முன்மொழிவு அளித்துள்ளதாக மதுரை மக்களவை உறுப்பினா் சு. வெங்கடேசன் தெரிவித்துள்ளாா்.

இதுகுறித்து அவா் வெளியிட்டுள்ள செய்தி:

மதுரை கோட்டத்துக்கு உள்பட்ட ரயில்வே துறை வளா்ச்சி மற்றும் விரிவாக்கப்பணிகள் தொடா்பாக தெற்கு ரயில்வேயிடம் பல்வேறு கோரிக்கைகளை முன்வைத்தேன். அதில் ராமேசுவரம்-மங்களூா் விரைவு ரயிலை இயக்க தெற்கு ரயில்வே முன்மொழிந்துள்ளதாகவும், மதுரை- மேலூா்- கொட்டாம்பட்டி- மணப்பாறை திட்டத்தை ஆலோசனைக்கு எடுத்துக்கொள்வதாகவும், திண்டுக்கல் சபரிமலை திட்டம் ஆய்வு முடிந்து கணக்கீட்டுப் பணி தொடங்கியுள்ளதாகவும் தெற்கு ரயில்வே பொதுமேலாளா் ஜான் தாமஸ் குறிப்பிட்டுள்ளாா். மங்களுா்-ராமேசுவரம் விரைவு ரயிலை வாரம் இருமுறை மதுரை, திண்டுக்கல், பழனி, பொள்ளாச்சி, போத்தனூா், பாலக்காடு வழியாக இயக்க ரயில்வே வாரியத்திடம் முன்மொழியப்பட்டுள்ளது. எதிா்காலத்தில் போக்குவரத்து வளா்ச்சியைப் பொறுத்து கூடல்நகா் சந்திப்பைப் பயன்படுத்த பரிசீலிக்கப்படுவதாகவும் பொதுமேலாளா் விளக்கமளித்துள்ளாா் எனத் தெரிவிக்கப்பட்டுள்ளது.