மதுரை வைகை ஆற்றில் இருகரைகளையும் தொட்டுச் செல்லும் தண்ணீா்

வைகை அணையிலிருந்து திறந்துவிடப்பட்ட தண்ணீா் மதுரையை வியாழக்கிழமை காலை அடைந்த நிலையில், ஆற்றின் இருகரைகளையும் தொட்டு தண்ணீா் சென்று கொண்டிருக்கிறது.

கடந்த சில நாள்களாகப் பெய்து வரும் தொடா் மழையால் வைகை அணை புதன்கிழமை நிரம்பியது. அதையடுத்து அணை திறக்கப்பட்டு ஆற்றிலும், பாசனக் கால்வாய்களிலும் தண்ணீா் வெளியேற்றப்பட்டு வருகிறது. ஏற்கெனவே, வழியோரங்களில் பல கண்மாய்கள் நிரம்பி ஓடைகள் வழியாக வைகை ஆற்றில் மழைநீா் வந்து கொண்டிருந்தது. இதனிடையே, வைகை அணையிலிருந்தும் தண்ணீா் திறக்கப்பட்டதால், அதிகளவுக்கு தண்ணீா் பெருக்கெடுத்து வந்தது.

அணையிலிருந்து திறக்கப்பட்ட தண்ணீா் மதுரை மாவட்ட எல்லையை வியாழக்கிழமை காலையில் அடைந்த நிலையில், ஆற்றின் இருகரைகளையும் தொட்டு தண்ணீா் சென்று கொண்டிருக்கிறது.

மதுரை மாவட்டத்தில் வைகை ஆற்றங்கரையோரங்களில் வசிப்பவா்களுக்கு பொதுப்பணி மற்றும் வருவாய்த் துறையினா் எச்சரிக்கை விடுத்துள்ளனா். ஆற்றில் குளிக்கவோ, கால்நடைகளை இறங்கச் செய்யவோ வேண்டாம் என அறிவுறுத்தியுள்ளனா். மேலும் கரையோரப் பகுதிகளில் தொடா் கண்காணிப்பில் ஈடுபட்டு வருகின்றனா்.

மதுரை மாநகரப் பகுதியில் ஆற்றின் இரு கரைகளிலும் மாநகராட்சி, காவல் துறையினா், தீயணைப்புப் படையினா் கண்காணிப்பில் ஈடுபட்டு வருகின்றனா். பேச்சியம்மன் படித்துறை பகுதியில் சலவைத் தொழிலாளி மீனாட்சிசுந்தரம் (40), ஆற்றில் வியாழக்கிழமை மாலை தவறி விழுந்து மூழ்கினாா். அவரைத் தேடும் பணியில் தீயணைப்பு வீரா்கள் ஈடுபட்டுள்ளனா்.

மதுரையில் வைகை ஆற்றில் கல்பாலம் பகுதியில் தடுப்பணை அமைக்கப்பட்டுள்ளது. இப் பகுதியில் இருகரையோரங்களிலும் தடுப்புச் சுவா் இல்லாதது அபாயகரமாக இருந்தது. அவ்வழியே செல்லும் வாகன ஓட்டிகள், பாதசாரிகள் தவறி விழுந்துவிடக் கூடும் என்பதால், அதைத் தவிா்ப்பதற்கான முன்னெச்சரிக்கை நடவடிக்கையாக தடுப்புச் சுவா் கட்டும் பணி நடைபெற்று வருகிறது.

கண்காணிப்பு அலுவலா் ஆய்வு: வடகிழக்குப் பருவமழையையொட்டி மதுரை மாவட்டத்திற்கு சிறப்பு கண்காணிப்பு அலுவலராக நியமிக்கப்பட்டுள்ள தமிழக அரசின் கருவூலக் கணக்குத் துறை ஆணையா் டி.என்.வெங்கடேஷ் பல்வேறு இடங்களில் வியாழக்கிழமை ஆய்வு செய்தாா். வாடிப்பட்டி வட்டம் குருவித்துறை, மண்ணாடிமங்கலம், சோழவந்தான் வடகரை ஆகிய இடங்களில் உள்ள கண்மாய்களை நேரில் பாா்வையிட்டாா். மாவட்ட ஆட்சியா் எஸ்.அனீஷ்சேகா் மற்றும் பொதுப்பணித் துறையினா் உடன் இருந்தனா்.