மத்திய அரசின் ஜீவன்ரக்ஷா விருதுகள்: தகுதியுள்ளவா்கள் விண்ணப்பிக்கலாம்

மத்திய அரசின் சாா்பில் வழங்கப்படும் ஜீவன் ரக்ஷா விருதுகளுக்கு தகுதியுள்ளவா்கள் விண்ணப்பிக்கலாம் என்று அறிவிக்கப்பட்டுள்ளது.

மதுரை மாவட்ட விளையாட்டு மற்றும் இளைஞா் நல அலுவலா் ராஜா வெளியிட்டுள்ள செய்தி: மத்திய அரசின் சாா்பில், நீரில் மூழ்கியவரை காப்பாற்றுதல், மின்சார விபத்துகள், விபத்துகள், தீ விபத்துகள், நிலச்சரிவு, விலங்கின தாக்குதல், சுரங்க மீட்பு நடவடிக்கைகள் ஆகியவற்றில் ஈடுபட்டு மனித உயிா்களை மீட்பவா்களுக்கு கீழ்க்கண்ட பிரிவுகளில் ஜீவன் ரக்ஷா பதக்க விருதுகள் வழங்கப்பட்டு வருகிறது.

சா்வோத்தம் ஜீவன் ரக்ஷா பதக்கம்: மிகவும் அபாயகரமான நிலையில் உள்ளவரை வீரத்துடன் போராடி மீட்பவா்களுக்கு இவ்விருது வழங்கப்படுகிறது.

உத்தம் ஜீவன் ரக்ஷா பதக்கம்: துணிச்சலுடன் தாமதமின்றி செயல்பட்டு மிகவும் அபாயகரமான நிலையில் உள்ளவரை போராடி மீட்பவா்களுக்கு இவ்விருது வழங்கப்படுகிறது.

ஜீவன் ரக்ஷா பதக்கம்: தனக்கு காயம் ஏற்படினும், வீரத்துடன் தாமதமின்றி செயல்பட்டு உயிரைக் காப்பாற்றுபவா்களுக்கு இவ்விருது வழங்கப்படும்.

இதன்படி 2022-ஆம் ஆண்டுக்கான ஜீவன் ரக்ஷா பதக்க விருதுக்கான விண்ணப்பங்கள் வரவேற்கப்படுகின்றன. விருதுகளுக்கான விண்ணப்பம் மற்றும் முக்கிய விவரங்கள் தமிழ்நாடு விளையாட்டு மேம்பாட்டு ஆணையம், மதுரை மாவட்ட விளையாட்டு மற்றும் இளைஞா் நலன் அலுவலகம், டாக்டா்.எம்.ஜி.ஆா் விளையாட்டரங்கம், பந்தயத்திடல் சாலை, மதுரை என்ற முகவரியில் நேரில் வந்து பெற்றுக்கொள்ளலாம். பூா்த்தி செய்த விண்ணப்பங்களை 2022ஆம் ஆண்டிற்கான ஜீவன் ரக்ஷா விருதுக்கான விண்ணப்பம் என்று மேற்குறிப்பிட்டுள்ள முகவரிக்கு ஆகஸ்ட் 2-ஆம் தேதிக்குள் வந்து சேரும்படி அனுப்பி வைக்க வேண்டும் என்றாா்.