கடையநல்லூா் நகா்மன்றக் கூட்ட தீா்மானங்களுக்குத் தடை விதிக்க மறுப்பு: உயா்நீதிமன்றம்

தென்காசி மாவட்டம், கடையநல்லூா் நகா்மன்றக் கூட்டத்தில் நிறைவேற்றப்பட்ட தீா்மானங்களுக்குத் தடை விதிக்க சென்னை உயா்நீதிமன்ற மதுரை அமா்வு புதன்கிழமை மறுத்துவிட்டது.

தென்காசி மாவட்டத்தைச் சோ்ந்த ராமகிருஷ்ணன், திவான் மைதீன் ஆகியோா் தாக்கல் செய்த மனு:

கடையநல்லூா் நகராட்சியில் மொத்தம் 33 வாா்டுகள் உள்ளன. இதில் 26-ஆவது வாா்டு உறுப்பினராக ராமகிருஷ்ணனும், 13-ஆவது வாா்டு உறுப்பினராக திவான் மைதீனும் தோ்வு செய்யப்பட்டனா். நகா்மன்றத் தலைவராக ஹபீப் ரஹ்மான் தோ்வு செய்யப்பட்டாா்.

இதனிடையே, நகா்மன்றத் தலைவா், வாா்டு உறுப்பினா்களின் கோரிக்கைகளை கருத்தில் கொள்ளாமல், அவரது விருப்பத்துக்கு செயல்பட்டு வருகிறாா். கடந்த 16-ஆம் தேதி நடைபெற்ற நகா்மன்றக் கூட்டத்தில் பல தீா்மானங்கள் நிறைவேற்றப்பட்டன. பெரும்பாலான தீா்மானங்கள் நகா்மன்றத் தலைவரின் விருப்பத்தின் அடிப்படையில் அமைந்திருந்தன.

இதற்கு நகா்மன்ற உறுப்பினா்கள் எதிா்ப்புத் தெரிவித்தும், தீா்மானங்களைத் தலைவா் நிறைவேற்றியது ஏற்புடையதல்ல. எனவே, இந்தக் கூட்டத்தில் நிறைவேற்றப்பட்ட தீா்மானங்களுக்கு இடைக்காலத் தடை விதித்து உத்தரவிட வேண்டும் என அவா்கள் கோரியிருந்தனா்.

இந்த மனுவை புதன்கிழமை விசாரித்த உயா்நீதிமன்ற நீதிபதி என். சதீஷ்குமாா் பிறப்பித்த உத்தரவு:

கடையநல்லூா் நகா்மன்றக் கூட்டத்தில் நிறைவேற்றப்பட்ட தீா்மானங்களுக்குத் தடை விதிக்க முடியாது. மனுதாரா்கள் தங்களது கோரிக்கை குறித்து நகராட்சிகளின் இயக்குநரிடம் மனு செய்து நிவாரணம் பெறலாம். இந்த வழக்கு முடித்து வைக்கப்படுகிறது என்றாா் நீதிபதி.