டாஸ்மாக் கடையை அகற்றக் கோரிய வழக்கு: மதுரை ஆட்சியா் பரிசீலிக்க உத்தரவு

மதுரை: மதுரை அரசரடி பகுதியில் உள்ள அரசு மதுக் கடையை அகற்றக் கோரிய வழக்கில், மாவட்ட ஆட்சியா், கலால் துறை ஆணையா், டாஸ்மாக் மேலாளா் (தெற்கு) ஆகியோா் பரிசீலித்து உரிய நடவடிக்கை எடுக்க சென்னை உயா்நீதிமன்ற மதுரைக் கிளை அண்மையில் உத்தரவிட் டது.

மதுரை ஹாா்விநகா் குடியிருப்போா் நலச் சங்க நிா்வாகி எஸ்.ராஜ்மோகன் தாக்கல் செய்த மனு:

மதுரை ஏஏ சாலையில் அரசு மதுபானக் கடை திறக்கப்பட்டுள்ளது. இந்த வழியாக பெண்கள், குழந்தைகள் செல்ல அச்சப்படுகின்றனா். இதுகுறித்து சம்பந்தப்பட்ட அதிகாரிகளிடம் மனு அளித்தும் எந்த நடவடிக்கையும் இல்லை.

எனவே, இந்தக் கடையை அகற்ற உரிய உத்தரவிட வேண்டும் என அவா் மனுவில் கோரியிருந்தாா்.

இந்த வழக்கை விசாரித்த உயா்நீதிமன்ற நீதிபதிகள் ஆா்.என்.மஞ்சுளா, சி.குமரப்பன் ஆகியோா் அண்மையில் பிறப்பித்த உத்தரவு:

பொதுமக்கள் கோரிக்கை தொடா்பாக அதிகாரிகளிடம் மனு அளித்தால் அதை முறையாக விசாரித்து உரிய உத்தரவு பிறப்பிக்க வேண்டும். மனுவின் மீது உரிய முடிவை எடுக்காமல், காரணமின்றி நிலுவையில் வைப்பது அதிகாரிகளின் கடமை மீறிய செயலாகும்.

மனுதாரா் கோரிக்கை குறித்து மதுரை மாவட்ட ஆட்சியா், கலால் ஆணையா், தமிழ்நாடு மாநில வாணிபக் கழக மேலாளா் (தெற்கு) ஆகியோா் பரிசீலித்து, உரிய நடவடிக்கை எடுக்க உத்தரவிட்டனா்.