ஊராட்சித் தலைவா் பதவி நீக்க விவகாரம்: தனி நீதிபதியின் உத்தரவுக்கு இடைக்காலத் தடை

திருச்சி மாவட்டம், மல்லியம்பத்து ஊராட்சித் தலைவா் பதவி நீக்கம் தொடா்பான வழக்கில், தனி நீதிபதியின் உத்தரவுக்கு சென்னை உயா்நீதிமன்ற மதுரை அமா்வு புதன்கிழமை இடைக்காலத் தடை விதித்தது.

திருச்சி மாவட்டம், அந்தநல்லுாா் ஊராட்சி ஒன்றியத்துக்குள்பட்ட மல்லியம்பத்து ஊராட்சி மன்றத் தலைவராக விக்னேஷ்வரன் பதவி வகித்தாா். இவா், பொதுமக்களிடமிருந்து வீட்டு வரி, குடிநீா் வரி, தொழில் வரியாக வசூலித்த ரூ. 74 லட்சத்தை ஊராட்சி நிதியில் செலுத்தாமல் மோசடி செய்ததாகப் புகாா் எழுந்தது.

இதுகுறித்து ஊராட்சி மன்ற வாா்டு உறுப்பினா்கள் அளித்த புகாரின் பேரில், விளக்கம் கோரி விக்னேஷ்வரனுக்கு குறிப்பாணை அனுப்பப்பட்டது. இதற்கு அவரது தரப்பிலிருந்து பதில் அளிக்காததையடுத்து, பஞ்சாயத்துராஜ் சட்டத்தின் கீழ், அவா் காசோலையில் கையொப்பமிடும் அதிகாரம் பறிக்கப்பட்டது. மேலும், முறைகேடு குறித்து அவா் உரிய விளக்கம் அளிக்காததால், தலைவா் பதவியிலிருந்து நீக்கப்பட்டாா்.

இந்த நிலையில், விக்னேஷ்வரன் சென்னை உயா்நீதிமன்ற மதுரை அமா்வில் வழக்கு தொடுத்தாா். இதில், ஊராட்சி மன்றத் தலைவா் பதவியிலிருந்து விக்னேஷ்வரனை நீக்கியது செல்லாது என தனி நீதிபதி உத்தரவிட்டாா்.

இந்த உத்தரவை எதிா்த்து, திருச்சி மாவட்ட ஆட்சியா் தரப்பில் சென்னை உயா்நீதிமன்ற மதுரை அமா்வில் மேல் முறையீட்டு மனு தாக்கல் செய்யப்பட்டது.

இந்த மனு உயா்நீதிமன்ற நீதிபதிகள் எம்.எஸ். ரமேஷ், ஏ.டி. மரிய கிளாட் முன் புதன்கிழமை விசாரணைக்கு வந்தது.

அப்போது அரசுத் தரப்பில் கூடுதல் தலைமை வழக்குரைஞா் பாஸ்கரன் முன்னிலையாகி முன்வைத்த வாதம்:

மல்லியம்பத்து ஊராட்சி மன்றத் தலைவராகப் பதவி வகித்த விக்னேஷ்வரன் பல்வேறு முறைகேடுகளில் ஈடுபட்டு அரசுக்கு நிதி இழப்பை ஏற்படுத்தியுள்ளாா். இதை, தனி நீதிபதி கவனத்தில் கொள்ளாமல் மாவட்ட ஆட்சியரின் உத்தரவை ரத்து செய்தாா். எனவே, இந்த உத்தரவுக்குத் தடை விதிக்க வேண்டும் என்றாா்.

இதைப் பதிவு செய்து கொண்ட நீதிபதிகள் பிறப்பித்த உத்தரவு:

திருச்சி மாவட்ட ஆட்சியரின் உத்தரவை ரத்து செய்த தனி நீதிபதியின் உத்தரவுக்கு, இடைக்காலத் தடை விதிக்கப்படுகிறது. இந்த வழக்கு விசாரணை ஒத்திவைக்கப்படுகிறது என்றனா் நீதிபதிகள்.