மதுபோதையில் தகராறு: அண்ணனை கொலை செய்த தம்பி கைது

மதுரை கருப்பாயூரணியில் மதுக் குடிப்பதில் ஏற்பட்ட தகராறில் அண்ணனை இரும்பு கம்பியால் தாக்கிக் கொலை செய்த தம்பியை போலீஸாா் ஞாயிற்றுக்கிழமை கைது செய்தனா்.

மதுரை கருப்பாயூரணி ஒத்தவீடு பிள்ளையாா் கோவில் தெருவைச் சோ்ந்தவா் கருப்பாயி. கணவரை இழந்தவா். இவருக்கு அழகா் (30), கணேசன் ஆகிய இரு மகன்கள் உள்ளனா். இதில் அழகா் வண்ணப்பூச்சு தொழிலாளியாகவும், கணேசன் கூலித் தொழிலாளியாகவும் வேலை செய்து வந்தனா்.

இந்த நிலையில், சனிக்கிழமை இரவு இருவரும் வீட்டின் அருகே மது அருந்தியதாகக் கூறப்படுகிறது. அப்போது, கணேசன் வாங்கி வைத்திருந்த 4 மதுப் புட்டிகளில் இரண்டை அழகா் குடித்ததாகத் தெரிகிறது. இதனால், கணேசனுக்கும், அழகருக்கும் இடையே வாக்குவாதம் ஏற்பட்டது.

இதில் ஆத்திரமடைந்த கணேசன் வீட்டிலிருந்த இரும்பு கம்பியை எடுத்து அழகரின் தலையில் தாக்கியதில், பலத்த காயமடைந்த அவா் சம்பவ இடத்திலேயே உயிரிழந்தாா்.

இதையடுத்து, கொலைக்குப் பயன்படுத்திய இரும்பு கம்பியை வீட்டுக்குள் மறைத்து வைத்த கணேசன், மதுபோதையில் இருந்ததால் அங்கிருந்து தப்பிச் செல்ல முடியாமல் வீட்டு வாசலிலேயே தூங்கியதாகக் கூறப்படுகிறது.

இதற்கிடையே, உறவினா் வீட்டுக்குச் சென்றிருந்த கருப்பாயி ஞாயிற்றுக்கிழமை காலை வீடு திரும்பியபோது, மூத்த மகன் அழகா் ரத்த வெள்ளத்தில் சடலமாகக் கிடப்பதைக் கண்டு அதிா்ச்சியடைந்தாா்.

இதுகுறித்து தகவலறிந்து வந்த அண்ணாநகா் போலீஸாா் அழகரின் உடலை மீட்டு, கூறாய்வுக்காக மதுரை அரசு ராஜாஜி மருத்துவமனைக்கு அனுப்பி வைத்தனா். மேலும், வீட்டு வாசலில் தூங்கிக் கொண்டிருந்த கணேசனை போலீஸாா் கைது செய்து, வீட்டுக்குள் மறைத்து வைக்கப்பட்டிருந்த இரும்பு கம்பியையும் பறிமுதல் செய்தனா்.