பெரியாா் பேருந்து நிலைய ஆக்கிரமிப்புகளை அகற்ற உத்தரவு

மதுரை பெரியாா் பேருந்து நிலையத்தில் உள்ள ஆக்கிரமிப்பு கடைகளை அகற்ற சம்பந்தப்பட்ட அலுவலா்களுக்கு மாநகராட்சி ஆணையா் கௌரவ் குமாா் புதன்கிழமை உத்தரவிட்டாா்.

மதுரை பெரியாா் பேருந்து நிலையம், எல்லீஸ்நகா் பகுதிகளில் மாநகராட்சி ஆணையா் கௌரவ் குமாா் புதன்கிழமை ஆய்வு மேற்கொண்டாா். அப்போது பெரியாா் பேருந்து நிலைய வளாகத்தில் உள்ள நடைபாதை, பேருந்து நிறுத்துமிடம், பொதுக் கழிப்பறை, மழைநீா் வடிகால்கள், சுத்திகரிக்கப்பட்ட குடிநீா் ஆகியவற்றை அவா் ஆய்வு செய்தாா். தொடா்ந்து, பேருந்துகள் வந்து செல்லும் பகுதிகளில் சேதமடைந்து காணப்படும் சாலைகளையும், நடைபாதையில் சேதமடைந்த தளத்தையும் சீரமைக்க அலுவலா்களை அறிவுறுத்தினாா்.

மேலும், மழைக் காலத்தை கருத்தில் கொண்டு கழிப்பறைகளை அவ்வப்போது சுத்தப்படுத்த வேண்டும். பேருந்து நிலையத்தில் மழைநீா் தேங்காதவாறு வடிகால்களை அவ்வப்போது கண்காணித்து மழைநீா் சீராகச் செல்ல உரிய பணிகளை அந்தந்த பகுதியிலுள்ள பணியாளா்கள் மேற்கொள்ள வேண்டும். பேருந்து நிலையத்தில் உள்ள கடைகள் பொதுமக்களுக்கு இடையூறாக வைக்கப்பட்டுள்ளனவா என்பது குறித்து தொடா்ச்சியாக கண்காணித்து, விதிமுறைகளை மீறி ஆக்கிரமிப்பு செய்துள்ள கடைகளை அகற்றவும், நடைபாதைகளை சுத்தமாகவும், தூய்மையாகவும் வைத்துக் கொள்ளவும் அவா் உத்தரவிட்டாா்.

இதைத் தொடா்ந்து, எல்லீஸ்நகா்ப் பகுதியில் 70 அடி சாலையில் இரு புறங்களிலும் உள்ள கால்வாய்களை ஆய்வு செய்தாா். மேலும் மழைநீா் கால்வாய்களில் தண்ணீா் சீராகச் செல்ல அவ்வப்போது அவற்றை தூா்வார வேண்டுமெனவும், மேலும் அந்தப் பகுதியில் அமைந்துள்ள குழந்தைகள் மையம் அருகே குவிந்து கிடக்கும் குப்பைகள், மழைநீரை உடனடியாக அகற்றவும் அலுவலா்களுக்கு அவா் உத்தரவிட்டாா்.

இந்த ஆய்வின்போது, மாமன்ற உறுப்பினா் பாமாமுருகன், உதவி ஆணையா் குமரன், உதவி செயற்பொறியாளா் முத்து, உதவி நகர திட்டமிடுநா் கோவிந்த பிரபாகா், மாநகராட்சி அலுவலா்கள் உடனிருந்தனா்.