8 குடிசைகளில் பூட்டை உடைத்து ரூ.3 லட்சம் மீன்பிடி பொருள்கள் திருட்டு

ராமேசுவரம் துறைமுகப் பகுதியில் 8 குடிசைகளில் பூட்டை உடைத்து ரூ.3 லட்சம் மதிப்புள்ள மீன்பிடி பொருள்களை மர்ம நபர்கள் திருடிச்சென்றதாக புகார் செய்யப்பட்டுள்ளது.

 ராமேசுவரம் துறைமுகப்பகுதியில் 500க்கும் மேற்பட்ட மீனவர்கள் குடிசைகள் அமைத்துள்ளனர். இந்த குடிசைகளில் மீனவர்கள் மீன்பிடிக்க பயன்படுத்தப்படும் பொருள்கள் வைக்கப்பட்டிருக்கும். இந்நிலையில் தங்கச்சிமடத்தைச் சேர்ந்த எமரிட், சூசை, அருள், ஜீசஸ், கெம்லக்ஸ், அமுதம், சேர்ந்துராய், விஷால் ஆகிய 8 மீனவர்களின் குடிசைகளில் ஞாயிற்றுக்கிழமை இரவு மர்ம நபர்கள் பூட்டை உடைத்து மீன்பிடிக்க  பயன்படும் 2 ஜிபிஎஸ் கருவிகள், 2 வாக்கிடாக்கி, 20க்கும் மேற்பட்ட பிளாஸ்டிக் கேன்கள், என்ஜின் பொருள்கள், உணவு பாத்திரங்கள், எடைபார்க்கும் கருவிகள் உள்பட ரூ.3 லட்சம் மதிப்புள்ள பொருள்களை திருடிச்சென்றுள்ளனர்.

இதுகுறித்து மீனவர்கள் அளித்த புகாரின்பேரில் துறைமுகம் போலீஸார் வழக்குப்பதிவு செய்து விசாரித்து வருகின்றனர்.