கமுதி வேளாண் கல்லூரியில் விவசாயிகளுக்கு பயிற்சி

கமுதி அருகே வேளாண்மை கல்லூரியில் நாட்டு நலப் பணித் திட்ட தன்னார்வ மாணவர்கள் சார்பில் விவசாயிகளுக்கு கோடைபருத்தியில் பிபிஎப்எம் தெளிப்பு பற்றிய செயல் விளக்கம் செவ்வாய்கிழமை அளிக்கப்பட்டது.
   வறட்சியால் வயல் வெளிகளில் வாடி வரும் பயிர்களை மீட்க இளஞ்சிவப்பு மெத்தைலோ பாக்டீரியம் ( பி.பி.எம்.)  எனும்- ஒரு புதிய தொழில் நுட்பமானது தமிழ்நாடு வேளாண்மை பலகலைக்கழகம் கோவையில் அறிமுகப்படுத்தியது. இந்நிலையில்  கமுதி  நம்மாழ்வார் வேளாண்மை தொழில் நுட்பக் கல்லூரி மாணவர்கள் மற்றும் பேராசிரியர் சு. மணிசேகரன்,  விவசாயிகளுக்கு பிபிஎப்எம் எவ்வாறு தெளிப்பது, எப்பொழுது தெளிப்பது, என்பது பற்றி   விவசாயிகளுக்கு விரிவாக விளக்கினர் . அப்போது அவர்கள் கூறியதாவது:  எல்லாப் பயிர்களுக்கும் 1 சதவீதம் கரைசலை காலை அல்லது மாலை நேரங்களில் தெளிக்கலாம். அவ்வாறு தெளிப்பதால் பயிர்கள் 10 முதல் 15 நாட்கள் வரை வறட்சியை தாங்கி வளரும். ஓவ்வொரு பயிரின் வளர்ச்சியின் தன்மையைப் பொருத்து 15 நாட்கள்  இடைவெளியில் 2 அல்லது 3 தெளிப்புகள்  பயிரின் வளர்ச்சி காலத்தில் தேவைப்படும் . எனவே தற்போது நிலவிவரும் கடுமையான  வறட்சியில் விவசாயிகள் ஒரு சதவீதம் பிபிஎப்எம் திரவத்தை காலை அல்லது மாலையில் கைத்தெளிப்பான் கொண்டு இலைகள் நன்கு நனையுமாறு தெளிக்க வேண்டும்.    இவ்வாறு தெளிப்பதால் வறட்சி தாங்கும் திறனை பயிர்களுக்கு அளிக்கிறது. விதை முளைப்புத் திறன் அதிகரிக்கிறது. நாற்றுக்களின் வளர்ச்சி அதிகரிக்கிறது. பூக்கும் காலம் மற்றும் காய்களின் அறுவடை காலத்தைக் குறைக்கிறது. பழங்கள், காய்கள் மற்றும் விதைகளின் நிறம் மற்றும் தரம் அதிரிக்கிறது. மகசூல் 10 சதவிகிதம் அதிகரிக்கிறது  என்றனர்.