ராமநாதபுரத்தில் செப்.16-இல் மகாகவி பாரதி விழா

ராமநாதபுரத்தில் வரும் 16 ஆம் தேதி (ஞாயிற்றுக்கிழமை) மகாகவி பாரதி விழா நடைபெறுகிறது.
தமிழ்ச்சங்கம் சார்பில் அரவிந்த அரங்கத்தில் நடைபெறும் விழாவுக்கு புதுச்சேரி பேராசிரியர் கிருங்கை சேதுபதி தலைமை வகிக்கிறார். தமிழ்ச்சங்க உறுப்பினர்களின் பாரதி பாட்டரங்கத்துடன் விழா தொடங்குகிறது. மூத்த வழக்குரைஞர் மு.ராமசாமி விழாவை அறிமுகம் செய்து வைத்துப் பேசுகிறார். பாரதி உருவப்படத்தை சங்கத்தின் மகளிர் அணியின் தலைவி டாக்டர் மதுரம் அரவிந்தராஜ் திறந்து வைக்கிறார். 
 டாக்டர் கமலா ராகுல் கவிதாஞ்சலி வாசிக்கிறார். தத்துவமசி என்ற தலைப்பில் ராம்மோகனும், நல்லதோர் வீணை-பாரதி என்ற தலைப்பில் சங்கத்தின் தலைவர் மை.அப்துல்சலாமும் பேசுகின்றனர். இதனையடுத்து நல்லதோர் வீணை என்ற தலைப்பில் பாரதி பாடிய பாடல்களின் கவியரங்கம், சங்க செயலாளர் பொ.சந்திரசேகரன் தலைமையில் நடைபெறுகிறது. 
நிறைவாக பாரதி விழாவில் கலந்து கொண்டு பல்வேறு போட்டிகளில் வெற்றி பெற்ற மாணவ, மாணவியர்க்கு சங்கத்தின் சார்பில் சே.நல்லமுத்து நினைவுப்பரிசு வழங்கும் நிகழ்ச்சி நடைபெறுகிறது.