ரூ.50 ஆயிரத்தை எடுத்து  ஓட முயன்ற இளைஞர்  காவல் நிலையத்தில் ஒப்படைப்பு

ராமேசுவரம் தபால் நிலையம் அருகே இரு சக்கர வாகனப் பெட்டியிலிருந்து ரூ.50 ஆயிரம் பணத்தை எடுத்துக்கொண்டு ஓட முயன்ற இளைஞரை, வியாழக்கிழமை பொதுமக்கள் பிடித்து காவல் துறையினரிடம் ஒப்படைத்தனர். 
    ராமேசுவரம் வெண்மணி நகரைச் சேர்ந்த டேவிட்சன் என்பவர், தலைமை தபால் நிலையத்துக்கு வந்துள்ளார். அப்போது, தனது இரு சக்கர வாகனத்தை நிறுத்தி பெட்டியில் இருந்த பொருளை எடுத்துக்கொண்டு அலுவலகத்துக்குள் சென்றுள்ளார். பெட்டியை மூடாமல் சென்றதைக் கண்ட இளைஞர், அதற்குள் இருந்த ரூ.50 ஆயிரத்தை எடுத்துக்கொண்டு ஓடியுள்ளார். இதைக் கண்ட பொதுமக்கள் அவரை விரட்டிப் பிடித்து, காவல் நிலையத்தில் ஒப்படைத்தனர்.
    அதையடுத்து, டேவிட்சன் அளித்த புகாரின்பேரில், போலீஸார் இரட்டை பிள்ளையார் கோயில் பகுதியைச் சேர்ந்த பரமசிவம் மகன் மணிகண்டன்(36) என்பவர் மீது வழக்குப் பதிந்து கைது செய்தனர்.