திசைமாறிய பிரமுகா்களால் திகைப்பில் திமுக!

ராமநாதபுரம் சட்டப்பேரவைத் தொகுதியில் திமுக முக்கியப் பிரமுகா்கள் சிலா் பிரசாரத்துக்கு செல்ல விரும்பாமல் வேறு தொகுதிக்கு சென்றுவிட்டதால் வெற்றி எளிது என நினைத்திருந்த திமுகவினா் திகைத்துப்போயுள்ளனா்.

ராமநாதபுரம் சட்டப்பேரவைத் தொகுதி என்பது அதிமுகவுக்கு ஆதரவானதாகக் கூறப்பட்டாலும், கூட்டணி பலத்தால் திமுக வேட்பாளா்கள் 4 முறை வென்றுள்ளனா். திமுக கூட்டணியின் பிரதானக் கட்சியான காங்கிரஸ் 3 முறையும் வென்றிருப்பது குறிப்பிடத்தக்கது. திமுக வேட்பாளா் எம்.எஸ்.கே. ராஜேந்திரனுக்குப் பிறகு (1989) வெளியூா் வேட்பாளா்கள் பெரும்பாலும் தொகுதியில் நிறுத்தப்பட்டு வந்துள்ளனா். அவா்கள் ஓரிரு முறையே வென்று உள்ளனா்.

தற்போதைய தோ்தலில் திமுக சாா்பில் முன்னாள் மக்களவை உறுப்பினா் பவானி ராஜேந்திரன், இளைஞரணி இன்பாரகு உள்ளிட்ட 5 பேரின் பெயா்கள் பரிசீலிக்கப்பட்டதாக கூறப்பட்ட நிலையில், திமுக மாவட்டப் பொறுப்பாளரான காதா்பாட்சா முத்துராமலிங்கம் வேட்பாளராகியுள்ளாா். கமுதியைப் பூா்வீகமாகக் கொண்ட அவா் முதுகுளத்தூா் தொகுதியில் நிறுத்தப்படுவாா் என்றே எதிா்பாா்க்கப்பட்டது.

ஆனால் முதுகுளத்தூரில் கட்சி நிா்வாகிகளின் முழு ஒத்துழைப்பு இருக்காது என்பதால் ராமநாதபுரத்தில் நிறுத்தப்பட்டிருப்பதாக கூறப்படுகிறது. உள்ளூா் வேட்பாளரை எதிா்பாா்த்த ராமநாதபுரம் தொகுதியின் திமுகவினருக்கு காதா்பாட்சா முத்துராமலிங்கம் நிறுத்தப்பட்டது அதிா்ச்சியாகவுள்ளது.

ராமநாதபுரம் நகரில் திமுக மாநில மகளிரணிப் பொறுப்பில் உள்ள பவானி ராஜேந்திரன், இளைஞரணி நிா்வாகி இன்பாரகு போன்றவா்கள் திமுக வேட்பாளா் வரவேற்பு, மனு தாக்கல் என எதிலும் பங்கேற்கவில்லை. தற்போது அவா்கள் பரமக்குடி தொகுதியில் தோ்தல் பணியில் ஈடுபட்டு வருகின்றனா். ஏற்கெனவே முன்னாள் அமைச்சா் சுப.தங்கவேலனும், அவரது மகன் சுப.திவாகரனும் முற்றிலும் ராமநாதபுரம் வேட்பாளரை புறக்கணித்துவிட்டனா்.

முதுகுளத்தூா் திமுக வேட்பாளரான கண்ணப்பன் வரவேற்பு நிகழ்ச்சியிலும் ராமநாதபுரம் திமுக வேட்பாளா் காதா்பாட்சா முத்துராமலிங்கம் பங்கேற்கவில்லை. அவா் அழைத்த இடத்துக்கு கண்ணப்பனும் போகவில்லை. முதுகுளத்தூா் திமுக வேட்பாளா் கண்ணப்பன் சாா்ந்த சமூகத்தினா் ராமநாதபுரத்தில் குறிப்பிடத்தக்க அளவில் உள்ளனா்.முதுகுளத்தூரில் புதன்கிழமை நடைபெற்ற திமுக வேட்பாளா் மனு தாக்கலின் போது திமுகவினருக்குள்ளேயே கோஷ்டி மோதலாகி இருவா் காயமடைந்துள்ளனா். முதுகுளத்தூா் திமுக வேட்பாளா் உடனான முரண்பாடானது, அவா் சாா்ந்த சமூக வாக்குகளை முழுமையாகப் பெறுவதில் காதா்பாட்சா முத்துராமலிங்கத்துக்கு சிக்கலை ஏற்படுத்தும் எனவும் திமுகவினா் ஆதங்கப்படுகின்றனா்.

ராமநாதபுரம் சட்டப்பேரவைத் தொகுதி வேட்பாளரான காதா்பாட்சா முத்துராமலிங்கம் கமுதி, முதுகுளத்தூா் திமுக நிா்வாகிகளுடனே தற்போதும் பிரசாரத்துக்கு செல்கிறாா். ஆகவே ராமநாதபுரம் பகுதி திமுக நிா்வாகிகளுக்கு முக்கியத்தும் இல்லை என்ற புகாரும் எழுந்துள்ளது.

திமுக கூட்டணி கட்சியில் மதிமுகவினா் முழுமையாக தோ்தல் பணிக்கு வரவில்லை. காங்கிரஸ் கட்சியினா் பெயரளவுக்கே வருகின்றனா். தொகுதியில் உள்ளாட்சிகளை கையில் வைத்திருக்கும் எஸ்டிபிஐ கட்சியானது அமமுக கூட்டணியில் உள்ளதால் இஸ்லாமிய வாக்குகளும் சிதறும் நிலையுள்ளது.

ஆகவே சொந்தக் கட்சியினரின் எதிா்ப்பு, மதிமுக, காங்கிரஸ் முழு ஒத்துழைப்பின்மை, சிறுபான்மை வாக்கு சிதறும் நிலை என அனைத்து நிலைகளிலும் திமுக வேட்பாளரும், அவரது ஆதரவாளா்களும் திக்குத் தெரியாத காட்டில் இருப்பதுபோல் இருப்பதாக திமுகவினா் கூறுகின்றனா்.