புதுச்சேரி, கேரளம், அசாமில் பிரசாரம் நிறைவு!

சட்டப்பேரவைத் தேர்தல் நடைபெறவுள்ள புதுச்சேரி, கேரளம், அசாம் மாநிலங்களில் தீவிரமாக நடைபெற்றுவந்த பிரசாரம் இன்று (ஏப். 7) மாலையுடன் ஓய்ந்தது.

கேரளம், அசாம் மாநிலங்களுக்கும் புதுச்சேரி யூனியன் பிரதேசத்துக்கும் ஏப். 9 ஆம் தேதி ஒரேகட்டமாக வாக்குப்பதிவு நடைபெறவுள்ளது.

புதுச்சேரியில் 30 தொகுதிகளில் 294 வேட்பாளர்கள் களத்தில் உள்ளனர். 1,099 வாக்குச்சாவடிகள் தயார் நிலையில் வைக்கப்பட்டுள்ளன.

புதுச்சேரியில் காங்கிரஸ், திமுக கட்சிகளிடையே நீண்ட இழுபறிக்குப் பிறகு தொகுதி உடன்பாடு ஏற்பட்டு, மொத்தமுள்ள 30 பேரவைத் தொகுதிகளில் காங்கிரஸுக்கு 16, திமுகவுக்கு 14 தொகுதிகள் ஒதுக்கீடு செய்யப்பட்டன.

திமுக தனக்கு ஒதுக்கப்பட்ட தொகுதிகளிலிருந்து ஒரு இடத்தை விசிகவுக்கு ஒதுக்குவதாக அறிவித்தது. ஆனால், விசிக மூன்று தொகுதிகளில் தனித்துப் போட்டியிடுவதாக அறிவித்துள்ளது. இந்நிலையில், காங்கிரஸுக்கு ஒதுக்கப்பட்ட 16 தொகுதிகள் தவிர, திமுக போட்டியிடும் 6 தொகுதிகளில் நட்பாக காங்கிரஸ் போட்டியிடுகிறது.

புதுச்சேரியில் தங்கள் வேட்பாளர்களை ஆதரித்து பிரதமர் நரேந்திர மோடி, உள்துறை அமைச்சர் அமித் ஷா, காங்கிரஸ் மக்களவை எதிர்க்கட்சித் தலைவர் ராகுல் காந்தி, அதிமுக பொதுச்செயலரும் தமிழக எதிர்க்கட்சித் தலைவருமான எடப்பாடி பழனிசாமி, தவெக தலைவர் விஜய் உள்ளிட்டோர் பிரசாரத்தில் ஈடுபட்டனர்.

கேரளம்

கேரளத்தில் ஆளும் இடது ஜனநாயக முன்னணி, ஐக்கிய ஜனநாயக முன்னணி மற்றும் தேசிய ஜனநாயகக் கூட்டணி ஆகியவற்றுக்கிடையே மும்முனைப்போட்டி நிலவுகிறது.

மொத்தமுள்ள 140 பேரவைத் தொகுதிகளில் மொத்தம் 890 வேட்பாளா்கள் களத்தில் உள்ளனா். இதில்  92 பெண் வேட்பாளா்கள்.  

மாநிலம் முழுவதும் 2.71 கோடி வாக்காளா்கள் உள்ளனர். இவா்கள் வாக்களிக்க வசதியாக 30,471 வாக்குப்பதிவு மையங்கள் அமைக்கப்பட்டுள்ளன.

அஸ்ஸாம்

வடகிழக்கு பிராந்தியத்தில் முக்கியத்துவம் வாய்ந்த அஸ்ஸாமில் தொடா்ந்து மூன்றாவது முறையாக ஆட்சிக்கு வர பாஜக முனைப்பு காட்டும் நிலையில், ஆட்சியைக் கைப்பற்றும் நோக்கில் காங்கிரஸ் களமிறங்கியுள்ளது.

தேசிய ஜனநாயக கூட்டணியில் பாஜக 90 தொகுதிகளிலும், எதிா்க்கட்சி கூட்டணியில் காங்கிரஸ் 99 தொகுதிகளிலும் போட்டியிடுகின்றன. திரிணமூல் காங்கிரஸ் 22 தொகுதிகளிலும், ஆம் ஆத்மி 18 தொகுதிகளிலும் தனித்து களம் காண்கின்றன. தோ்தல் களத்தில் மொத்தம் 722 வேட்பாளா்கள் உள்ளனா். இவா்களில் 59 போ் பெண்கள்.