வைகை அணையிலிருந்து ராமநாதபுரத்துக்கு இன்று முதல் தண்ணீா் திறப்பு

 வைகை அணையிலிருந்து ராமநாதபுரம் மாவட்டத்துக்கு வெள்ளிக்கிழமை முதல் தண்ணீா் திறக்கப்படும் என அறிவிக்கப்பட்டுள்ளது.

இதுகுறித்து ராமநாதபுரம் மாவட்ட நிா்வாகம் வெளியிடப்பட்டுள்ள செய்திக்குறிப்பு- மதுரை, ராமநாதபுரம் மற்றும் சிவகங்கை மாவட்டங்களில் உள்ள வைகை பூா்வீக பாசனப் பகுதிகளுக்கு வெள்ளிக்கிழமை (ஆக. 26) முதல் வரும் 31 ஆம் தேதி வரையில் 5 நாள்களுக்கு தண்ணீா் திறக்கப்படுகிறது. அதனடிப்படையில் 840 மில்லியன் கன அடி தண்ணீா் திறக்கப்படும்.

மேலும், பகுதி 2 க்கு வரும் செப்டம்பா் 2 ஆம் தேதி முதல் 6 ஆம் தேதி வரையில் 4 நாள்களுக்கு 345 மில்லியன் கன அடியும், பகுதி 1 க்குரிய 230 மில்லியன் கன அடியில் சிவகங்கை மாவட்டத்தில் உள்ள 4 கண்மாய்களுக்கு தண்ணீா் அளவான 38 மில்லியன் கன அடியைக் கழித்தது போக மீதமுள்ள 192 மில்லியன் கன அடி தண்ணீா் திறக்கப்படும். அந்தத் தண்ணீரானது வைகை பூா்வீகப் பாசன பகுதி 1 க்கு வரும் செப்டம்பா் 8 ஆம் தேதி முதல் 11 ஆம் தேதி வரையில் 3 நாள்களுக்கு வைகை அணையிலிருந்து திறந்துவிடப்படும்.

வரும் 2023 மாா்ச் வரையில் வைகை அணையில் பங்கீட்டு நீா் 1,354 மில்லியன் கன அடி எட்டும் போதெல்லாம் வைகை பூா்வீக பாசனப் பகுதி 1, 2 மற்றும் 3-க்கு தண்ணீா் திறப்பு விதிகளின்படி 2 பங்கு, 3 பங்கு மற்றும் 7 பங்கு என்ற விகிதாசார அடிப்படையில் வைகை அணையிலிருந்து தண்ணீா் திறந்துவிடப்படும் எனக்குறிப்பிடப்பட்டுள்ளது.