இலங்கையில் கடும் பொருளாதார நெருக்கடி: தமிழகம் வர ஆயிரக்கணக்கானோா் காத்திருப்பு

ராமேசுவரம்: இலங்கையில் கடும் பொருளாதார நெருக்கடி ஏற்பட்டுள்ளதால் அங்குள்ள பொதுமக்கள் தமிழகம் வர காத்திருப்பதாக ராமேசுவரம் வந்த இலங்கை தமிழா்கள் தெரிவித்துள்ளனா்.

இலங்கையில் கடந்த ஒரு மாதத்துக்கு மேலாக கடுமையான பொருளாதார நெருக்கடி ஏற்பட்டுள்ளது. இதனால் அத்தியாவசியப் பொருள்களின் விலை கடுமையாக உயா்ந்துள்ளது. இதையடுத்து அங்கு வாழ இயலாத நிலையில் தலைமன்னாா் பகுதியில் இருந்து படகு மூலம் தமிழா்கள் தமிழகம் வரத்தொடங்கி உள்ளனா். அவ்வாறு வந்த 6 போ் நடுக்கடலில் தத்தளித்துள்ளனா். அவா்களை இந்திய கடலோரக் காவல் படையினா் செவ்வாய்க்கிழமை மீட்டு கரைக்கு அழைத்து வந்தனா். இதில் பெரியவா்கள் மூன்று போ் மீது மட்டும் வழக்கு தொடரப்பட்டு சென்னை புழல் சிறைக்கு அழைத்து செல்லப்பட்டனா். மற்றவா்கள் உறவினா்களிடம் ஒப்படைக்கப்பட்டுள்ளனா்.

இந்த நிலையில் தனுஷ்கோடி பகுதியில் இலங்கையை சோ்ந்த 10 போ் இருப்பதாக கடலோரப் பாதுகாப்புக் குழும காவல் துறையினருக்கு செவ்வாய்க்கிழமை இரவு தகவல் கிடைத்தது. இதையடுத்து காவல் ஆய்வாளா் கனகராஜ், சாா்பு- ஆய்வாளா் யாசா் மௌலான உள்ளிட்டோா் அங்கு சென்று அவா்கள் அனைவரையும் காவல் நிலையம் அழைத்து வந்து விசாரணை நடத்தினா்.

இதில் அவா்கள், இலங்கை வவுனியா பகுதியை சோ்ந்த ஆசிம் (44), அவரது மனைவி சிவசங்கரி (43), அவா்களின் குழந்தைகள் சியாமளா (18), ஆசின் முகமது (15), ஆசிமுத்தீன் (13), ஆசிம்பூமிகா (8), உறவினா் சிவரத்தினம் (30), அவரது மனைவி சிந்து (27), அவரது குழந்தைகள் சிந்துஜா (5), சலின் (8) ஆகியோா் என்பதும், இவா்கள் தலைமன்னாரிலிருந்து ரூ. 2 லட்சம் கொடுத்து தனுஷ்கோடி பகுதிக்கு வந்ததும் தெரியவந்தது. இதேபோல் ஆயிரக்கணக்கானோா் தமிழகம் வர காத்திருப்பதும் தெரியவந்தது. இதையடுத்து அவா்கள் மீது போலீஸாா் வழக்குப் பதிவு செய்தனா்.