கம்பன் விழா: தமிழக ஆளுநா் இன்று ராமேசுவரம் வருவகை

கம்பன் விழாவில் பங்கேற்பதற்காக தமிழக ஆளுநா் ஆா்.என்.ரவி திங்கள்கிழமை ராமேசுவரம் வருகிறாா்.

ராமநாதபுரம் மாவட்டம், ராமேசுவரத்தில் லட்சுமண தீா்த்தம் பகுதியில் உள்ள தனியாா் அரங்கில் 35- ஆம் ஆண்டு கம்பன் விழா திங்கள், செவ்வாய் ஆகிய 2 நாள்கள் நடைபெறுகிறது. இந்த விழாவின் முதல் நாள் நிகழ்ச்சியில் தமிழக ஆளுநா் ஆா்.என்.ரவி கலந்து கொள்கிறாா்.

இதற்காக அவா் விமானம் மூலம் மதுரைக்கு வந்த பிறகு, அங்கிருந்து காா் மூலம் ராமநாதபுரம் அரசு விருந்தினா் மாளிகைக்கு காலை 10 மணிக்கு வருகிறாா். அங்கு சிறிது ஓய்வுக்கு பிறகு, பாம்பன் குந்துகால் விவேகானந்தா் மணி மண்டபத்துக்கு பகல் ஒரு மணிக்கு வருகிறாா்.

பின்னா், ராமேசுவரத்தில் நடைபெறும் கம்பன் விழாவில் பிற்பகல் 2.30 மணிக்கு அவா் கலந்துகொள்கிறாா். மாலை 4 மணி அளவில் நிகழ்ச்சி முடிந்து, மீண்டும் சாலை வழியாக மதுரைக்கு செல்கிறாா்.

ஆளுநா் வருகையை முன்னிட்டு பாம்பன் குந்துகால், ராமேசுவரம் தனியாா் மகால் உள்ளிட்ட பகுதிகளில் 100-க்கும் மேற்பட்ட போலீஸாா் பாதுகாப்புப் பணியில் ஈடுபட்டுள்ளனா்.