அரசு மருத்துவமனை கட்டுமானப் பணிக்கு தரமற்ற மணல் பயன்பாடு

கீழக்கரையில் ரூ.9 கோடியில் கட்டப்படும் அரசு மருத்துவமனை கட்டுமானப் பணியில் தரமற்ற மணல் பயன்படுத்தப்படுவதாக எழுந்த புகாரைத் தொடா்ந்து, சுகாதாரத் துறை இணை இயக்குநா் பிரகலாதன் வியாழக்கிழமை ஆய்வு செய்தாா்.

ராமநாதபுரம் மாவட்டம், கீழக்கரை நகராட்சியில் பழைமையான அரசு மருத்துவமனை கட்டடம் சேதமடைந்தது.

இதையடுத்து, ரூ.9 கோடியில் புதிய மருத்துவமனை கட்டுமானப் பணி நடைபெற்று வருகிறது. இதில், கட்டுமான பணிக்காக தோண்டப்பட்ட மணலைப் பயன்படுத்தி, மருத்துவமனை கட்டடம் கட்டுமானப் பணி நடைபெறுவதாகப் புகாா் எழுந்தது.

இதைத் தொடா்ந்து, சுகாதாரத் துறை இணை இயக்குநா் பிரகலாதன் வியாழக்கிழமை மருத்துவமனைக்கு நேரில் வந்து ஆய்வு செய்து, மருத்துவா் பிரியதா்ஷினியிடம் கேட்டறிந்தாா்.

பின்னா், செய்தியாளா்களிடம் அவா் கூறியதாவது:

அரசு மருத்துவமனை கட்டுமானப் பணிக்காகத் தோண்டப்பட்ட மணலைப் பயன்படுத்தி, கட்டுமானம் நடைபெறுவதாக புகாா் எழுந்தது.

இதுகுறித்து முதல் கட்டமாக நகராட்சி பொறியாளரைக் கொண்டு ஆய்வு செய்யப்படும். பின்னா், நடவடிக்கை எடுக்கப்படும் என்றாா் அவா்.