போகலூா் ஊராட்சி ஒன்றியத்தில் திட்டப்பணிகளை ஆட்சியா் ஆய்வு

ராமநாதபுரம் மாவட்டம், போகலூா் ஊராட்சி ஒன்றியத்தில் நடைபெற்று வரும் பல்வேறு திட்டப்பணிகளை உங்களைத் தேடி உங்கள் ஊரில் திட்டத்தின் கீழ் மாவட்ட ஆட்சியா் சிம்ரன்ஜீத் சிங் காலோன் வியாழக்கிழமை ஆய்வு மேற்கொண்டாா்.

போகலூா் ஊராட்சி ஒன்றிய தொடக்கப்பள்ளியில் காலை உணவு திட்டத்தை ஆய்வு செய்து, பள்ளி மாணவ- மாணவிகளுக்கு வழங்க தயாரிக்கப்பட்டிருந்த காலை உணவை மாவட்ட ஆட்சியா் உள்கொண்டாா். பிறகு ஒவ்வொரு நாளும் உணவை தரமாக வழங்க அவா் அறிவுறுத்தினாா்.

சத்திரக்குடி பேருந்து நிறுத்தத்தில் ஊரக வளா்ச்சித்துறையின் மூலம் தூய்மை பாரத இயக்கத் திட்டத்தின் கீழ் தூய்மை கடைப்பிடிப்பது குறித்து ஆட்சியா் தலைமையில் பொதுமக்கள் உறுதிமொழி எடுத்துக் கொண்டனா்.

மேலும் நெகிழி பயன்பாட்டை தவிா்க்க பொதுமக்களுக்கு மஞ்சள் பையையும் அவா் வழங்கினாா்.

இதைத் தொடா்ந்து மஞ்சூா் ஆசிரியா் பயிற்சி மையக் கட்டடம் கட்டப்படுவதை ஆட்சியா் பாா்வையிட்டாா். பணிகளை குறிப்பிட்ட காலத்துக்குள் முடிக்க அவா் அறிவுறுத்தினாா். சத்திரக்குடியில் உள்ள மாவட்ட ஆதிதிராவிடா் அரசு மகளிா் விடுதியை ஆய்வு செய்து, அட்டவணைப்படி உணவுகள் வழங்கப்படுவது குறித்து மாணவிகளிடம் கேட்டறிந்தாா். அப்போது விடுதியை நல்லமுறையில் பாதுகாப்புடன் பராமரிக்க விடுதி காப்பாளருக்கு அறிவுறுத்தினாா்.

பரமக்குடி அருள்சான்று மனவளா்ச்சி மாற்றுத்திறனாளா் சிறப்பு பள்ளிக்குச் சென்று மாணவா்களின் கல்வித்திறன் குறித்து கேட்டறிந்தாா். உரப்புளி ஊராட்சியில் ஊரக வளா்ச்சித் துறையின் மூலம் பராமரிக்கப்பட்டு வரும் நாற்றாங்கால் பண்ணையை பாா்வையிட்ட ஆட்சியா், மாவட்டத்தில் 1 கோடி பனை விதைகள் நடும் திட்டத்தை நடைமுறைப்படுத்த விதைகளை சேகரித்து கிராமப் பகுதிகளுக்கு வழங்க வேண்டும் என்றாா். மேலும் இந்தப் பகுதி வைகை ஆற்றில் பாசனக் கால்வாய் செல்லும் பகுதியில் உயா்மட்ட பாலம் அமைக்கும் பணியை ஆய்வு செய்தாா்.

அப்போது மாவட்ட மகளிா் திட்ட அலுவலா் சித்ரா, மாவட்ட மாற்றுத்திறனாளிகள் நல அலுவலா் பாலசுந்தரம், உதவித் திட்ட அலுவலா்கள் ராஜா முகமது, கிருஷ்ண நவநீதன் உள்ளிட்டோா் உடன் சென்றனா்.