இடைக்காட்டூரில் நவநீதப்பெருமாள் எழுந்தருளல்

சிவகங்கை மாவட்டம், இடைக்காட்டூர் பகுதியில் திருக்கூடல்மலை நவநீதப் பெருமாள் ஞாயிற்றுக்கிழமை எழுந்தருளினார்.
 மானாமதுரை சூட்டுக்கோல் மாயாண்டி சுவாமிகளால் திருப்பரங்குன்றம் திருக்கூடல்மலையில் சூட்டுக்கோல் நவநீதப் பெருமாள் பிரதிஷ்டை செய்யப்பட்டார். இந்நிலையில், ஆண்டுதோறும் ஆடிப் பௌர்ணமிக்கு திருக்கூடல் மலையிலிருந்து உற்சவர் நவநீதப் பெருமாள் மானாமதுரை பகுதிகளில் பவனி வருவது வழக்கம். அதன்படி, மலையிலிருந்து புறப்பட்ட நவநீதப் பெருமாள், வழியில் பல்வேறு மண்டகப்படிகளில் எழுந்தருளி, இடைக்காட்டூர் வந்தடைந்தார். முன்னதாக வாகுடி, அன்னியனேந்தல், குன்றாமணியேந்தல் உள்ளிட்ட இடங்களில் அமைக்கப்பட்டிருந்த திருக்கண்களிலும் பெருமாள் எழுந்தருளினார். அங்கு பக்தர்கள் நவநீதப் பெருமாளை வரவேற்று பூஜைகள் நடத்தினர்.
இன்று மானாமதுரை வருகை: மானாமதுரைக்கு திங்கள்கிழமை மதியம் நவநீதப் பெருமாள் வந்தடைகிறார். அவருக்கு அண்ணாசிலை அருகே உள்ள தர்மசாஸ்தா ஐயப்பன் கோயிலில் செங்கல் காளவாசல் தொழிலாளர்கள் சார்பில் வரவேற்பு அளிக்கப்படுகிறது.