சிலம்பு விரைவு ரயில் வாரத்தில் மூன்று நாள்கள் இயக்கப்படுவதற்கு வரவேற்பு

சென்னை - செங்கோட்டை வரை செல்லும் சிலம்பு விரைவு ரயில் திங்கள்கிழமை (பிப். 25) முதல் வாரத்தில் மூன்று நாள்கள் நிரந்தரமாக இயக்கப்படுவதற்கு காரைக்குடி தொழில் வணிகக் கழகம் வரவேற்பு தெரிவித்துள்ளது.
இதுகுறித்து அக்கழகத்தின் தலைவர் சாமி. திராவிடமணி ஞாயிற்றுக்கிழமை கூறியதாவது: சிலம்பு விரைவு ரயில் (எண்:16181 - 16182) வாரம் 2 நாள்களாக புதன் மற்றும் சனிக்கிழமைகளில் இயக்கப்பட்டது. இந்த ரயில் இனி, வாரத்துக்கு 3 நாள்கள் இயக்கப்படும் என ரயில்வே நிர்வாகம் தெரிவித்திருக்கிறது. அந்த வகையில் திங்கள்கிழமையும் இந்த ரயில் இயக்கப்படுவதை காரைக்குடி தொழில் வணிகக் கழகம் வரவேற்கிறது என்றார்.