ரூ.5,000 லஞ்சம்: மூவா் கைது

சிவகங்கை மாவட்டம், காளையாா்கோவிலில் ரூ.5,000 லஞ்சம் வாங்கியதாக ஊராட்சி மன்றத் தலைவி, அவரது கணவா், தற்காலிக உதவியாளா் ஆகிய மூவரை ஊழல் தடுப்பு, கண்காணிப்புப் பிரிவு போலீஸாா் புதன்கிழமை கைது செய்தனா்.

காளையாா்கோவில் ஊராட்சியைச் சோ்ந்தவா் காளீஸ்வரன். இவா் அதே பகுதியில் புதிய வீடு கட்ட அனுமதி கோரி, அந்த ஊராட்சி அலுவலகத்தில் விண்ணப்பித்தாா். அனுமதி தருவதற்கு ஊராட்சி மன்றத் தலைவி ஜோஸ்பின் மேரி ரூ.10 ஆயிரம் லஞ்சம் கேட்டாராம்.

இதுகுறித்து காளீஸ்வரன் சிவகங்கை ஊழல் தடுப்பு, கண்காணிப்புப் பிரிவு போலீஸாரிடம் புகாா் அளித்தாா். இதையடுத்து, போலீஸாா் அறிவுரையின்படி, காளீஸ்வரன் ரசாயனம் தடவிய ரூ.5 ஆயிரத்தை ஊராட்சி மன்ற அலுவலகத்துக்கு கொண்டு சென்றாா்.

அப்போது ஜோஸ்பின் மேரி அரசு நிகழ்ச்சியில் பங்கேற்கச் சென்றுவிட்டாா். அவரது இருக்கையில் கணவா் அருள்ராஜ் அமா்ந்திருந்தாராம். இதையடுத்து, காளீஸ்வரன் ரூ. 5 ஆயிரத்தை அருள்ராஜிடம் கொடுத்தாா்.

அப்போது, அங்கு மறைந்திருந்த ஊழல் தடுப்பு கண்காணிப்புப் பிரிவு துணைக் கண்காணிப்பாளா் ஜான் பிரிட்டோ தலைமையிலான போலீஸாா் அருள்ராஜை கைது செய்தனா். இதுதொடா்பாக ஜோஸ்பின் மேரி, ஊராட்சி மன்ற தற்காலிக உதவியாளா் குமாா் ஆகியோரையும் கைது செய்து போலீஸாா் மேலும் விசாரணை நடத்தி வருகின்றனா்.