சாலையோர வியாபாரிகளிடம் தரை வாடகை கூடுதலாக வசூலித்தால் நடவடிக்கை

சிவகங்கை மாவட்டம், காரைக்குடி மாநகராட்சியில் தீபாவளி பண்டிகையையொட்டி, சாலையோர வியாபாரிகளிடம் கூடுதலாக தரை வாடகை வசூலித்தால் குத்தகைதாரா்கள் மீது நடவடிக்கை எடுக்கப்படும் என்று மேயா் சே. முத்துத்துரை எச்சரித்தாா்.

காரைக்குடி மாநகராட்சியில் பண்டிகை காலங்களில் சாலையோரங்களில் வியாபாரிகள் பல்வேறு பொருள்கள் வைத்து வியாபாரம் செய்து வருகின்றனா். அண்மையில் ஆயுத பூஜை பண்டிகையின்போது பலத்த மழையினால் சாலையோர வியாபாரிகள் கடும் நஷ்டத்தைச் சந்தித்தனா்.

இந்த நிலையில், தரை வாடகை வசூலிக்கும் குத்தகைதாரா்கள் சாலையோர வியாபாரிகளிடம் கூடுதல் கட்டணம் வசூலித்ததாக காரைக்குடி மாநகராட்சிக்கு புகாா்கள் தெரிவிக்கப்பட்டன.

இந்த நிலையில், தீபாவளி பண்டிகை காலங்களிலும் கடந்த சில தினங்களாக சாலையோர வியாபாரிகளிடம் தரை வாடகையை அதிகமாக வசூலிப்பதாக புகாா் வந்ததையடுத்து, மாநகராட்சி மேயா் சே. முத்துத்துரை பெரியாா் சிலை முதல் செக்காலை வரையுள்ள சாலையோர வியாபாரிகளை நேரில் சந்தித்தாா். மாமன்ற உறுப்பினா்கள் சொ. கண்ணன், சித்திக், முன்னாள் நகா்மன்ற உறுப்பினா் பி.எல். ராமச் சந்திரன், மாநகராட்சி அதிகாரிகள் உள்ளிட்ட பலா் உடன் சென்றனா்.

மாநகராட்சி நிா்ணயம் செய்த தொகையான 20 சதுர அடிக்கு ரூ. 30, 15 சதுர அடிக்கு ரூ. 25, 10 சதுர அடிக்கு ரூ. 20 என தரை வாடகை கொடுத்தால் போதும். அதற்குமேல் குத்தகைதாரா்கள் கூடுதல் தொகை கேட்டால் மாநகராட்சிக்குத் தகவல் தெரிவிக்கவேண்டும் என்று மேயா் அறிவுறுத்தினாா். இதனால் வியாபாரிகள்மகிழ்ச்சியடைந்தனா்.

இதையடுத்து, மேயா் முத்துத்துரை கூறியதாவது:

மாநகராட்சி நிா்ணயித்த தொகையை தரை வாடகையாக குத்தகைதாரா்கள் வசூலிக்கவேண்டும். கூடுதலாக வசூலித்தால் குத்தகைதாரா்கள் மீது நடவடிக்கை எடுக்கப்படும் என்றாா் அவா்.