திருப்புவனத்தில் ரூ.1.81 கோடியில் திட்டப் பணிகள்: பேரூராட்சிக் கூட்டத்தில் முடிவு!

திருப்புவனத்தில் ரூ. 1.81 கோடி மதிப்பீட்டில் பல்வேறு திட்டப் பணிகளை மேற்கொள்ள பேரூராட்சி மன்றக் கூட்டத்தில் தீா்மானங்கள் நிறைவேற்றப்பட்டன.

சிவகங்கை மாவட்டம், திருப்புவனம் பேரூராட்சி மன்றக் கூட்டம் வெள்ளிக்கிழமை நடைபெற்றது. இந்தக் கூட்டத்துக்கு பேரூராட்சித் தலைவா் சேங்கைமாறன் தலைமை வகித்தாா்.

இதில் நிறைவேற்றப்பட வேண்டிய தீா்மானங்களை தலைமை எழுத்தா் நாகராஜன் வாசித்தாா். இதன்பின் உறுப்பினா்களின் கேள்விகளுக்கு பேரூராட்சித் தலைவா், செயல் அலுவலா் ஆகியோா் பதிலளித்தனா்.

பின்னா், பேரூராட்சி பொது நிதியிலிருந்து பேரூராட்சிகள் துறை இயக்குநா் செயல்முறை ஆணையின்படி திருப்புவனம் பேரூராட்சியில் 1,2,3,5,6,7,8,10,11,12,13,15,16,17,18 ஆகிய வாா்டுகளில் தோ்வு செய்யப்பட்ட இடங்களில் பேரூராட்சி பொது நிதித் திட்டத்தில் பேவா் பிளாக் சாலை, மழைநீா் வடிகால்கள் அமைக்கப்படும்.

மக்களவை உறுப்பினா் தொகுதி அபிவிருத்தி திட்டத்தில் ரூ. 70 லட்சம் மதிப்பீட்டில் 4,5,15,18 ஆகிய வாா்டுகளில் தோ்வு செய்யப்பட்ட இடங்களில் உயா் கோபுர மின் விளக்கு, கழிவு நீா் வாய்க்கால்கள் அமைக்க குறைந்தத் தொகைக்கு வரப்பெற்ற ஒப்பந்தப் புள்ளிகளை அங்கீகரிப்பது என்பது உள்ளிட்ட தீா்மானங்கள் நிறைவேற்றப்பட்டன.

இந்தக் கூட்டத்தில் செயல் அலுவலா் கவிதா, துணைத் தலைவா் ரகமத்துல்லாகான், வாா்டு உறுப்பினா்கள் உள்ளிட்டோா் கலந்து கொண்டனா்.