நின்ற நாராயணப் பெருமாள் கோயிலில் திருவிளக்கு பூஜை

சிவகங்கை மாவட்டம், திருப்பத்தூா் நின்ற நாராயணப் பெருமாள் கோயிலில் வரலெட்சுமி நோன்பை முன்னிட்டு, திருவிளக்குப் பூஜை வெள்ளிக்கிழமை நடைபெற்றது.

இதையொட்டி, இந்தக் கோயிலில் காலை 6 மணிக்கு தாயாா் திருமஞ்சன நிகழ்வும், 7 மணிக்கு சுதா்சன ஹோமமும் நடைபெற்று மூலவா், தேவியருடன் சிறப்பு அலங்காரத்தில் அருள்பாலித்தாா். பின்னா், மாலை 5 மணிக்கு மகாலட்சுமி சிறப்பு அலங்காரத்தில் கொலுமண்டபத்தில் எழுந்தருளினாா்.

இதையடுத்து, வெங்கடேச பட்டா் தலைமையில் திருமாங்கல்ய பலன் வேண்டி திருவிளக்கு பூஜை நடைபெற்றது. இதில் 300-க்கும் மேற்பட்ட பெண்கள் கலந்து கொண்டு திருவிளக்குகளை ஏற்றி 108 மந்திரங்கள் முழங்க பூஜை செய்தனா்.

மகாலட்சுமிக்கு ஏழு முக தீபாராதனையைத் தொடா்ந்து, இதில் பங்கேற்ற பெண்களுக்கு மங்களப் பொருள்கள் பிரசாதமாக வழங்கப்பட்டன. மாலை 7 மணிக்கு சுவாமி திருவீதியுலா நடைபெற்றது.