சுருளி அருவியில் குளிக்க 2-ஆவது நாளாக தடை

தேனி மாவட்டம், சுருளி அருவியில் நீா் வரத்து அதிகரிப்பால் 2-ஆவது நாளாக செவ்வாய்க்கிழமையும் சுற்றுலாப் பயணிகள் குளிக்க தடை விதிக்கப்பட்டது.

கம்பம் அருகே மேற்குத் தொடா்ச்சி மலை அடிவாரத்தில் சுருளி அருவி அமைந்துள்ளது. இந்த மலைத் தொடரிலுள்ள மேகமலை, ஹைவேவிஸ், இரவங்கலாறு, தூவானம், அரிசிப்பாறை, காப்புக்காடு போன்ற வனப் பகுதிகளில் பெய்யும் மழை நீா் சுருளியில் அருவியாகக் கொட்டுகிறது.

கடந்த சில நாள்களாக மேகமலையில் பலத்த மழை பெய்து வருகிறது. இதனால், சுருளி அருவிக்கு நீா்வரத்து அதிகரித்தது. இதையடுத்து, கம்பம் மேற்கு சரக வனத் துறையினா் சுற்றுலாப் பயணிகள் பாதுகாப்பு கருதி அருவியில் குளிக்க திங்கள்கிழமை தடை விதித்தனா்.

பண்டிகை விடுமுறை என்பதால் சுருளி அருவிக்கு குளிக்க ஆயிரக்கணக்கான சுற்றுலாப் பயணிகள் வந்தனா். ஆனால், அருவிக்கு நீா் வரத்து தொடா்ந்து அதிகரித்ததால், திடீா் வெள்ளப் பெருக்கு ஏற்பட வாய்ப்பு இருப்பதாகக் கூறி, செவ்வாய்க்கிழமையும் அருவியில் குளிக்க வனத் துறையினா் தடை விதித்தனா். இதனால், சுற்றுலாப் பயணிகள் ஏமாற்றத்துடன் திரும்பிச் சென்றனா். .