லாரி மோதி ஆட்டோ ஓட்டுநர் சாவு

விருதுநகர் அருகே லாரிக்கு டயர் மாற்றிய போது கண்டெய்னர் லாரி மோதி பலத்த காயம் அடைந்த ஆட்டோ ஓட்டுநர் சிகிச்சை பலனின்றி  உயிரிழந்தார்.

    திருநெல்வேலியில் இருந்து தேனி மாவட்டம் உத்தமபாளையத்திற்குச் சென்ற லாரி, திங்கள்கிழமை விருதுநகர் ஆட்சியர் அலுவலக வளாகம் எதிரே நான்கு வழிச்சாலையில் பஞ்சராகி நின்றது. லாரியின் டயரை மாற்ற டிரைவர் கார்த்திக்குக்கு, சூலக்கரையைச் சேர்ந்த ஆட்டோ டிரைவர் ஆசிர்வாதம்(41) உதவினார். அப்போது, தூத்துக்குடியில் இருந்து மதுரை நோக்கிச் சென்ற கண்டெய்னர் லாரி நின்றிருந்த லாரி மீது மோதியது.   இதில், டயர் மாற்றும் பணியில் ஈடுபட்டிருந்த கார்த்திக், ஆசிர்வாதம் ஆகியோர் பலத்த காயம் அடைந்தனர். உயிருக்கு ஆபத்தான நிலையில் அவர்கள் விருதுநகர் அரசு மருத்துவமனைக்குக் கொண்டு செல்லப்பட்டனர். அங்கு சிகிச்சை பயனின்றி ஆசிர்வாதம் உயிரிழந்தார். இது தொடர்பாக சூலக்கரை போலீஸார் தூத்துக்குடி அருகே மங்களகிரியைச் சேர்ந்த லாரி டிரைவர் சுரேஷ்குமாரை(35) கைது செய்தனர்.