விளைநிலங்களை சேதப்படுத்தும் காட்டுபன்றிகள்: விவசாயிகள் அவதி

ராஜபாளையம் அருகே பெரியகுளம் கண்மாய் பாசன நிலங்களில்  விளைச்சலை காட்டுப்பன்றிகள் சேதப்படுத்துவதால் விவசாயிகள் அவதியடைந்துள்ளனர்.

  ராஜபாளையம் அருகே உள்ள அயன் கொல்லங் கொண்டான் கிராமத்தை சேர்ந்தது பெரியகுளம் கண்மாய். இக் கண்மாயை சுற்றி ஆயிரம் ஏக்கருக்கும் மேற்பட்ட விவசாய நிலங்கள் உள்ளன. 10 விவசாயிகளுக்கு சொந்தமான சுமார் 500 ஏக்கர் பரப்பளவில் கடந்த மாதம் கரும்பு சாகுபடி செய்யப் பட்டுள்ளது. ஊடுபயிராக 4 ஏக்கர் பரப்பளவில் கத்திரி, தக்காளி, மிளகாய் மற்றும் பீர்க்கங்காய் பயிரிடப் பட்டுள்ளன.

 இந்த பயிர்களை கடந்த 10-ஆம் தேதி காட்டுப் பன்றிகள் சேதப்படுத்தின. சுமார் 25 ஏக்கரில் கரும்பு சேதமானது. அந்த இடங்களில் மீண்டும் பயிர் வகைகளை நட்டாலும் மறுநாள் சுமார் 60 பன்றிகள் புகுந்து புதிய பயிர்களையும் நாசம் செய்தன.

இதையடுத்து இரவுக் காவலுக்கு ஆள் வைத்ததால் பன்றிகளின் அட்டகாசம் குறைந்தது. தற்போது ஒரு மாத கரும்பு பயிர்கள் சுமார் 5 அடி வரை வளர்ந்து விட்ட நிலையில் மீண்டும் பன்றிகளின் அட்டகாசம் துவங்கியுள்ளதாக விவசாயிகள் கவலை தெரிவித்துள்ளனர்.

வன விலங்குகள் பட்டியில் உள்ள காட்டுப் பன்றிகளை விவசாய காடுகளுக்கு வர விடாமல் தடுக்க வனத்துறையினரிடம் பலமுறை புகார் கொடுத்தும் எந்த நடவடிக்கையும் இல்லை. பன்றிகளை தடுக்க எந்த நடவடிக்கையும் எடுக்கவில்லை. இனியாவது வனத்துறை உரிய நடவடிக்கை எடுக்க வேண்டும் என விவசாயிகள் தெரிவித்துள்ளனர்.