வாழ்வாங்கி கிராமத்தில் அடிப்படை வசதிகள் செய்து தரக் கோரிக்கை

விருதுநகர் மாவட்டம், அருப்புக்கோட்டை வட்டம் வாழ்வாங்கி கிராமத்தில் சாலை, வாருகால் உள்ளிட்ட அடிப்படை வசதிகள் செய்து தர பொதுமக்கள் கோரிக்கை விடுத்துள்ளனர்.
பெரியநாயகிபுரம் கிராம ஊராட்சிக்கு உள்பட்டஇக்கிராமத்தில் 1,200-க்கும் மேற்பட்டோர் வசிக்கின்றனர். இக்கிராமத்திலுள்ள தெருக்களில் போதிய மின்விளக்குகள் இல்லை. ஊருக்குள் 
செல்லும் பிரதான தார் சாலையும் சேதமடைந்து குண்டும் குழியுமாக உள்ளது. 
மேலும், இக்கிராமத்தில் வாருகால் வசதி இல்லாததால், பொதுமக்கள் தங்களது வீட்டருகே குழி தோண்டி கழிவுநீரை விடுகின்றனர். இதனால், துர்நாற்றம் வீசுவதுடன், நோய் பரவி வருகிறது.
    தங்களது கிராமத்தில் அடிப்படை வசதிகள் செய்து தரும்படி ஊராட்சி அலுவலகத்தில் பல ஆண்டுகளாகக் கோரிக்கை விடுத்தும் எந்தவித நடவடிக்கையும் எடுக்கப்படவில்லை என குற்றம் சாட்டுகின்றனர். 
எனவே, இக்கிராமத்தில் வாருகால், சாலை, தெரு விளக்குகள் உள்ளிட்ட அடிப்படை வசதிகளை விரைந்து ஏற்படுத்தித் தரவேண்டும் என, பொதுமக்கள் வலியுறுத்துகின்றனர்.