அவதூறு:  நகராட்சி வருவாய் அலுவலர் மீது பெண் ஊழியர்கள் புகார்

விருதுநகர் மாவட்டம், ராஜபாளையம் நகராட்சியில் பணியாற்றும் பெண் ஊழியர்கள் மீது அவதூறு பரப்பும் வருவாய் அலுவலர் மீது நடவடிக்கை எடுக்க வலியுறுத்தி, ஊழியர்கள் திங்கள்கிழமை ஒரு மணி நேர பணி புறக்கணிப்பு செய்து ஆர்ப்பாட்டத்தில் ஈடுபட்டனர்.
ராஜபாளையம் நகராட்சியில் 20 பெண்கள் உள்பட 60 க்கும் மேற்பட்டோர் பணியாற்றி வருகின்றனர். கடந்த 15 தினங்களாக இங்கு பணியாற்றும் பெண்களை, உடன் பணியாற்றும் ஆண்களுடன் இணைத்து உயர் அதிகாரிகளுக்கு கடிதம் மூலம் அவதூறு புகார்கள் சென்ற வண்ணம் இருந்தன. 
நகராட்சி ஊழியர்கள் விசாரித்த போது, இங்கு பணியாற்றும் வருவாய் அலுவலர் தனக்கு பிடிக்காத ஊழியர்கள் மீது, தன் உதவியாளர்கள் இருவர் உதவியுடன் அவதூறு கடிதம் எழுதி அனுப்பியது கண்டுபிடிக்கப் பட்டது.
இது குறித்து நகராட்சி ஆணையர் சரவணன் மூலம் அளித்த புகாரின் பேரில் இதற்கு உடந்தையாக இருந்த காளிமுத்து, அருண்குமார் ஆகிய இருவரிடம் போலீஸார் விசாரித்து வருகின்றனர்.
இந் நிலையில் வருவாய் அலுவலர் மீது துறை ரீதியாக நடவடிக்கை எடுக்கக் கோரி,  60 க்கும் மேற்பட்ட ஊழியர்கள்திங்கள்கிழமை ஒரு மணி நேரம் வேலை புறக்கணிப்பு போராட்டத்தில் ஈடுபட்டனர்.