விருதுநகா் அருங்காட்சியகத்தில் பழைமையான மூவரி இசைக்கருவி காட்சிப்படுத்தல்

விருதுநகா் அரசு அருங்காட்சியகத்தில் மூவரி என்ற பழைமையான இசைக்கருவி பொதுமக்கள் பாா்வைக்காக சனிக்கிழமை காட்சிப்படுத்தப்பட்டுள்ளது.

இது குறித்து காப்பாட்சியா் கிருஷ்ணம்மாள் தெரிவித்ததாவது: விருதுநகரில் உள்ள அரசு அருங்காட்சியகத்தில் மாதந்தோறும் ஒரு அரியவகை பொருள் பிரத்யேகமாக காட்சிப்படுத்தப்பட்டு வருகிறது. அதன்படி, இந்த மாதத்துக்கு மூவரி என்ற மிகவும் பழைமையான காற்றிசைக் கருவி பொதுமக்கள் பாா்வைக்கு வைக்கப்பட்டுள்ளது.

இந்த இசைக் கருவியானது, வடமேற்கு இந்தியாவில் பயன்படுத்தப்பட்டதாகும். கி.பி.330-க்கும் கி.பி. 400-க்கும் இடைப்பட்ட காலத்தில் காந்தார சிற்பத்தில் இக்கருவி சித்திரிக்கப்பட்டுள்ளது. இது, முவரி, மொஹோரி, மதுகரி போன்ற பிற பெயா்களாலும் அழைக்கப்படுகிறது.

இச்சொல்லானது மொழியியல் ரீதியாக குழாய் அல்லது வடிகால் என்ற பொருளையுடைய மோரி என்ற சொல்லில் இருந்து தோன்றியிருக்கலாம். இந்திய பாரம்பரிய இசை பற்றிய சம்ஸ்கிருத உரையான மாதங்கி முனியின் ‘பிரிஹத் தேஷி’ இது பற்றி குறிப்பிடுகிறது.

கன்னடக் கலைஞரும், துறவியும், இசைக் கலைஞருமான புரந்தரதாசா் ‘சூலடிகள்’ என்றழைக்கப்படும் அவரது இசையமைப்பில் இதைப் பற்றி குறிப்பிடுகிறாா். முவரியின் ஆதிவடிவம் பயன்பாட்டில் இல்லை என்றும், அதன் உருமாறிய வடிவங்களாகக் கருதப்படுகின்ற ‘மகுடி, சுந்தரி, செனாய் ( தமிழகம் ), முகவீணை (அஸ்ஸாம் ), மொஹோரி (மேகாலயா), கடங்குமுரி ( ஒடிஸா ), மஹீரி (குஜராத் ) ஆகிய காற்றிசைக் கருவிகளின் உருவத்தில் இன்று வரை உயிா்த்திருக்கிறது.

முவரி என்ற இந்த இசைக்கருவியை, உதகமண்டலத்தைச் சோ்ந்த ஆயுள் காப்பீட்டுக் கழக நிா்வாக அதிகாரி தினேஷ்வா்தன் என்பவா், விருதுநகா் அரசு அருங்காட்சியகத்துக்கு அன்பளிப்பாக வழங்கியுள்ளாா். இந்த பழைமையான இசைக் கருவியை ஜூன் மாதம் முழுவதும் பொதுமக்கள், மாணவ, மாணவிகள் கண்டுகளிக்கலாம் என்றாா் அவா்.