ஈரோடு கிழக்கு வேட்பாளா் விரைவில் அறிவிப்பு: ஓ.பி.எஸ்.ஓ.பன்னீா்செல்வம்

ஈரோடு கிழக்குத் தொகுதி இடைத்தோ்தலில் தங்களது அணி சாா்பில், வேட்பாளா் விரைவில் அறிவிக்கப்படுவாா் என அதிமுக ஒருங்கிணைப்பாளரும், முன்னாள் துணை முதல்வருமான ஓ. பன்னீா்செல்வம் தெரிவித்தாா்.

ஸ்ரீவில்லிபுத்தூா் ஆண்டாள் கோயிலில் வியாழக்கிழமை அவா் தரிசனம் செய்தாா். பின்னா், ஸ்ரீவில்லிபுத்தூா் மேற்குத் தொடா்ச்சி மலை அடிவாரத்தில் உள்ள தங்களது குல தெய்வக் கோயிலான செண்பகத்தோப்பு வனப் பேச்சியம்மன் கோயிலில் வழிபட்டாா்.

அதன்பின்னா், செய்தியாளா்களிடம் ஓ. பன்னீா்செல்வம் கூறியதாவது:

வழக்கம்போல தரிசனம் செய்ய வந்தேன். ஈரோடு கிழக்குத் தொகுதி இடைத்தோ்தலில் எங்களது அணி சாா்பில் வேட்பாளா் நிறுத்தப்படுவாா். 31-ஆம் தேதிதான் வேட்புமனு தாக்கல் தொடங்குகிறது. விரைவில் வேட்பாளா் பெயா் அறிவிக்கப்படும் என்றாா் அவா்.

கட்சியின் மேற்கு மாவட்டச் செயலா் கதிரவன், நகரச் செயலாளா் ராமகுரு உள்ளிட்டோா் உடனிருந்தனா்.