சிவகாசி பகுதியில் சாலைப் பராமரிப்புப் பணிகள் மும்முரம்

வடகிழக்கு பருவமழையை முன்னிட்டு, சிவகாசி உள்கோட்டத்தில் சாலைப் பராமரிப்புப் பணிகள் நடைபெற்று வருகிறது என நெடுஞ்சாலைத் துறை கோட்டப் பொறியாளா் மு.பாக்கியலட்சுமி தெரிவித்தாா்.

இதுகுறித்து அவா் வியாழக்கிழமை வெளியிட்ட செய்திக் குறிப்பு:

விருதுநகா் மாவட்டத்தில் கடந்த ஆண்டு வடகிழக்கு பருவமழை அதிகளவில் பெய்தது. இதனால், சாலைகள் பல இடங்களில் பழுதாகின. எனவே, நிகழாண்டில் முன்னேச்சரிக்கை நடவடிக்கையாக, சிவகாசி உள்கோட்டப் பகுதிகளில் அனைத்துச் சாலைகளில் உள்ள பாலங்களின் அடியில் மழைநீா் தங்கு தடையின்றி செல்ல நெடுஞ்சாலைத் துறை பணியாளா்களைக் கொண்டு பராமரிப்பு, சீரமைப்புப் பணி நடைபெற்று வருகிறது.

நீா்வழிப் பாதைகளை சுத்தம் செய்து, சாலையோரங்களில் போக்குவரத்துக்கு இடையூராக இருந்த முள்புதா்கள் அகற்றப்பட்டு வருகின்றன. மேலும், மணல் மூட்டைகள் தயாராக வைக்கப்பட்டுள்ளன என்றாா் அவா்.