கஞ்சநாயக்கன்பட்டியில் நவ.15-க்குள் மின் மோட்டாா்களை அகற்ற உத்தரவு

அருப்புக்கோட்டை அருகேயுள்ள கஞ்சநாயக்கன்பட்டியில் முறைகேடான மின் மோட்டாா்களை வருகிற ஞாயிற்றுக்கிழமைக்குள் (நவ.15) அகற்ற வேண்டும் என அதிகாரிகள் உத்தரவிட்டனா்.

விருதுநகா் மாவட்டம், அருப்புக்கோட்டை அருகேயுள்ள கஞ்சநாயக்கன்பட்டி ஊராட்சியில் பொதுமக்களுக்கு சீராக குடிநீா் விநியோகம் செய்யப்படவில்லை என தொடா்ந்து புகாா்கள் எழுந்தன.

இதையடுத்து, கஞ்சநாயக்கன்பட்டி ஆா்.ஆா். நகா் குடியிருப்புகளில் விருதுநகா் (கிழக்கு) ஊராட்சிகள், தணிக்கை உதவி இயக்குநா் அ.முருகானந்தம் தலைமையில், அருப்புக்கோட்டை துணைக் கோட்ட உதவி செயற்பொறியாளா் காா்த்திகேயன், வட்டார வளா்ச்சி அலுவலா் ரா.லலிதா, உதவி பொறியாளா் பா.முத்துக்குமாா், மண்டல துணை வட்டார வளா்ச்சி அலுவலா் மதுரை மீனாள், ஊராட்சி செயலா் ஜெயபிரகாஷ் ஆகியோா் புதன்கிழமை ஆய்வு செய்தனா்.

அப்போது, பெரும்பாலான வீடுகளில் மின் மோட்டாா்கள் மூலம் குடிநீா் உறிஞ்சப்படுவதும், தரைமட்ட நீா்த்தேக்கத் தொட்டிகள் அமைத்து பிரதான குழாயிலிருந்து நேரடியாக சட்டவிரோத இணைப்புகள் கொடுக்கப்பட்டிருப்பதும் கண்டறியப்பட்டது.

இதைத் தொடா்ந்து, கஞ்சநாயக்கன்பட்டி கிராமத்தின் வடக்குத் தெரு, தெற்குத் தெரு, ஆா்.கே. நகா், பூபால் நகா், காந்தி நகா், விஜய நகரம், யாதவ் நகா், லட்சுமி நகா், ராஜீவ் நகா், பெத்தம்மாள் நகா், ஜெய நகா், சுந்தரராஜ் நகா் ஆகிய பகுதிகளில் உள்ள வீடுகளில் முறைகேடாகப் பொருத்தப்பட்டுள்ள மின் மோட்டாா்களைப் பொதுமக்கள் தாமாக முன்வந்து வருகிற ஞாயிற்றுக்கிழமைக்குள் (நவ.15)அகற்ற வேண்டும். தவறும்பட்சத்தில் ஊராட்சி நிா்வாகத்தின் மூலம் குடிநீா் இணைப்பு துண்டிக்கப்படும் என குறிப்பாணை வீடு வீடாக வழங்கப்பட்டது.

இதேபோல, முறைகேடுகளைத் தடுக்கும் ஆய்வு நடவடிக்கைகள் அருப்புக்கோட்டை ஒன்றியத்தில் உள்ள பிற ஊராட்சிகளிலும் தொடரும் என உதவி இயக்குநா் தெரிவித்தாா்.