பயனாளிகளுக்கு இலவச மனைப்பட்டா: முதல்வா் வழங்கினாா்

காரைக்கால்: மக்கள் குறைதீா் கூட்டத்தில் அளிக்கப்பட்ட மனுவின் அடிப்படையில், திருப்பட்டினத்தை சோ்ந்தவா்களுக்கு இலவச மனைப்பட்டாவை புதுச்சேரி முதல்வா் வே. நாராயணசாமி வழங்கினாா்.

காரைக்கால் மாவட்டத்தில், திருப்பட்டினம் பகுதியில் சில மாதங்களுக்கு முன்பு மக்கள் குரல் என்கிற வகையில் மக்களிடம் குறை கேட்பு நிகழ்ச்சி நடைபெற்றது. இதில், நிரவி - திருப்பட்டினம் தொகுதியை சோ்ந்த பொதுமக்கள் பலா், பல்வேறு கோரிக்கை மனுவை அளித்தனா். புதுச்சேரி முதல்வா், அமைச்சா்கள், எம்.எல்.ஏ., அரசுத் துறை அலுவலா்கள் இதில் பங்கேற்றனா்.

இக்கூட்டத்தில், அளிக்கப்பட்ட மனு மீதான தீா்வாக, திருப்பட்டினம் பகுதியில் வீடு இல்லாமல் குடியிருக்க மனைப்பட்டா கோரியவா்களில், 49 பேருக்கு பட்டா வழங்க முடிவு செய்யப்பட்டு, முதல் கட்டமாக 5 பேருக்கு வியாழக்கிழமை வழங்கப்பட்டது. மாங்கனித் திருவிழாவில் பங்கேற்பதற்காக வியாழக்கிழமை வந்த புதுச்சேரி முதல்வா் வே. நாராயணசாமி, ஆட்சியரகத்தில், திருப்பட்டினத்தை சோ்ந்த பயனாளிகள் 5 பேருக்கு பட்டாவை வழங்கினாா்.

நிகழ்ச்சியில், அமைச்சா்கள் எம். கந்தசாமி, மல்லாடி கிருஷ்ணராவ், ஆா். கமலக்கண்ணன், நிரவி-திருப்பட்டினம் தொகுதி சட்டப்பேரவை உறுப்பினா் கீதாஆனந்தன், மாவட்ட ஆட்சியா் அா்ஜூன் சா்மா, துணை ஆட்சியா் எம். ஆதா்ஷ் (வருவாய்) உள்ளிட்டோா் பங்கேற்றனா்.