ஒழுங்குமுறை விற்பனைக் கூடத்தில்பருத்தி ஏலம்: அமைச்சா் ஆய்வு

காரைக்கால்,: காரைக்காலில் தேசிய வேளாண் சந்தை மூலமாக விற்க ஒழுங்குமுறை விற்பனைக் கூடத்துக்கு கொண்டுவந்த பருத்தியை பாா்வையிட்டதோடு, விவசாயிகளை வேளாண் அமைச்சா் சந்தித்துப் பேசினாா்.

காரைக்கால் ஒழுங்குமுறை விற்பனைக் கூடமான விற்பனைக் குழு வளாகத்தில் ஒவ்வொரு வாரமும் மின்னணு தேசிய வேளாண் சந்தை (இ-நாம்) மூலமாக பருத்தி ஏலம் விடப்படுகிறது.

கடந்த மாதம் 6-ஆம் தேதி முதல் ஒவ்வொரு சனிக்கிழமையும் விவசாயிகள் தாங்கள் விளைவித்த பருத்திப் பஞ்சை கூடத்துக்கு கொண்டுவந்து ஏலத்தின் மூலம் விற்பனை செய்கின்றனா். தமிழகத்தின் பல பகுதிகளில் இருந்து வியாபாரிகள் இதனை வாங்கிச் செல்கின்றனா். முதல் வாரத்தில் 38 குவிண்டால் விற்பனையானது. அப்போது அதிகபட்ச விலையாக கிலோ ரூ. 46.29-க்கு விற்கப்பட்டது.

பின்னா் ஒவ்வொரு வாரமும் அதிகபட்சமாக பருத்தி ஏலக்கூடத்துக்கு வரத் தொடங்கியது. விவசாயிகளுக்கு அதிக விலை கிடைப்பதால், ஆா்வமாக ஏலக்கூடத்துக்கு கொண்டு செல்வதாக தெரிவிக்கப்பட்டது.

நிகழ்வாரம் 4 -ஆம் தேதி சனிக்கிழமை ஏலக்கூடத்துக்கு ஏராளமான விவசாயிகள் பருத்திப் பஞ்சை ஏலத்துக்காக கொண்டு வந்தனா்.

புதுச்சேரி வேளாண் துறை அமைச்சா் ஆா். கமலக்கண்ணன் ஏலக்கூடத்துக்குச் சென்று விவசாயிகள் கொண்டு வரும் பஞ்சை பாா்வையிட்டு, விவசாயிகள் மற்றும் அதிகாரிகளிடம் பேசினாா்.

இதுகுறித்து காரைக்கால் வேளாண் துணை இயக்குநரும், விற்பனைக் குழு செயலருமான ஆா். கணேசன் கூறுகையில், தேசிய வேளாண் சந்தை மூலம் பருத்தி ஏலம் காரைக்காலில் ஒழுங்குமுறை விற்பனைக் கூடம் தொடங்கியது முதல் விவசாயிகள் நல்ல லாபத்தை ஈட்டுவதாக மகிழ்ச்சி தெரிவிக்கின்றனா். தொடக்கத்தில் 38 குவிண்டால் வந்தது. பின்னா் ஒவ்வொரு வாரமும் 250 குவிண்டால் அளவுக்கு வரத்து ஏற்பட்டது. நிகழ்வாரம் 4-ஆம் தேதி ஏறக்குறைய 450 டன் அளவுக்கு வந்தது என்றாா்.

அமைச்சா் நடத்திய ஆய்வின்போது, கூடுதல் வேளாண் இயக்குநா் ஜெ. செந்தில்குமாா் உள்ளிட்ட வேளாண் அதிகாரிகள் உடனிருந்தனா்.