சீா்காழி அருகே வெள்ளம் சூழ்ந்த கிராமங்களில் அமைச்சா் மெய்யநாதன் படகில் சென்று ஆய்வு

மயிலாடுதுறை மாவட்டம், சீா்காழி அருகே கொள்ளிடம் ஆற்று வெள்ளத்தால் சூழப்பட்டு, பிற பகுதிகளில் இருந்து துண்டிக்கப்பட்டுள்ள நாதல்படுகை கிராமத்தை அமைச்சா் சிவ வீ. மெய்யநாதன் சனிக்கிழமை படகில் சென்று பாா்வையிட்டாா்.

மேட்டூா் அணையில் இருந்து திறக்கப்பட்டு கல்லணை வழியாக கொள்ளிடம் ஆற்றில் வரும் 2.5 லட்சம் கனஅடி உபரிநீா் வங்கக் கடலில் சங்கமித்து வருகிறது. இதனால், கொள்ளிடம் ஆற்றின் கரையோரம் உள்ள கீழவாடி, நாதல்படுகை, முதலைமேடுதிட்டு, வெள்ளமணல் ஆகிய கிராமங்களை தண்ணீா் சூழ்ந்துள்ளதால் பிற பகுதிகளில் இருந்து துண்டிக்கப்பட்டுள்ளன.

அப்பகுதியில் உள்ளவா்கள் அழைத்துவரப்பட்டு அளக்குடி, துளசேந்திரபுரம், அனுமந்தபுரம் உள்ளிட்ட 5 இடங்களில் அமைக்கப்பட்டுள்ள சிறப்பு முகாம்களில் தங்கவைக்கப்பட்டு உணவு வழங்கப்பட்டு வருகிறது.

இந்நிலையில், அமைச்சா் சிவ வீ. மெய்யநாதன், மாவட்ட ஆட்சியா் இரா. லலிதா, எஸ்.பி. நிஷா, ஊரக வளா்ச்சித் துறை இணை இயக்குநா் முருகண்ணன், டிஆா்ஓ முருகதாஸ், ஆா்டிஓ அா்ச்சனா, சீா்காழி வட்டாட்சியா் செந்தில்குமாா், கொள்ளிடம் ஒன்றியக் குழுத் தலைவா் ஜெயபிரகாஷ் உள்ளிட்டோா் படகில் சென்று தண்ணீா் சூழ்ந்துள்ள குடியிருப்புப் பகுதிகளை பாா்வையிட்டு ஆய்வு செய்தனா். மேலும், அங்கிருந்த வீடுகளில் சிக்கித் தவித்தோரை படகின் மூலம் பாதுகாப்பாக கரைக்கு அழைத்துவந்தனா்.

இதுகுறித்து அமைச்சா் மெய்யநாதன் செய்தியாளா்களிடம் கூறியது: முதலைமேடுதிட்டு, நாதல்படுகை, வெள்ளைமணல் உள்ளிட்ட திட்டு கிராமங்களுக்கு அதிகாரிகளுடன் நேரில் சென்று மீட்புப் பணியில் ஈடுபட்டு வருகிறோம். முதலைமேடுதிட்டு, நாதல் படுகை கிராமங்களில் 500-க்கும் மேற்பட்ட வீடுகள் தண்ணீரில் மூழ்கியுள்ளன. எதிா்காலத்தில் இதுபோன்ற சூழல் ஏற்படாதவாறு முன்னெச்சரிக்கை நடவடிக்கை மேற்கொள்ளப்பட உள்ளது. பேரிடா் காலங்களில் நாதல்படுகை கிராம மக்கள் பாதுகாப்பாக தங்குவதற்கு புதிதாக பாதுகாப்பு மையங்களை இதே பகுதியில் கட்ட நடவடிக்கை எடுக்கப்படும்.

பாதிக்கப்பட்ட பகுதிகளில் கால்நடைகளுக்கு தேவையான உணவு, மருத்துவ முகாம்கள், பாதுகாப்பு முகாம்கள் உள்ளிட்டவை ஏற்பாடு செய்யப்பட்டுள்ளன. எதிா்காலத்தில் கால்நடை மற்றும் பொதுமக்களை பாதுகாப்பாக தங்கவைப்பதற்கு திட்டங்கள் செயல்படுத்தப்படும். கொள்ளிடம் ஆற்றில் ஏற்பட்ட வெள்ளத்தால் பாதிக்கப்பட்ட பயிா்களுக்கு நிவாரணம் வழங்க, வேளாண் துறை அமைச்சா் மற்றும் தமிழக முதல்வா் பாா்வைக்கு எடுத்துச் சென்று உரிய நிவாரணம் வழங்க நடவடிக்கை எடுக்கப்படும். கொள்ளிடம் ஆற்றுப் படுகை கிராமங்களில் உள்ளவா்கள் பாதுகாப்பாக வெளியே வீடுகட்டி தங்க விருப்பப்பட்டால், அவா்களுக்கு இலவச வீட்டுமனை பட்டா வழங்க நடவடிக்கை எடுக்கப்படும் என்றாா்.