புதைவட மின் விநியோகத் திட்டப் பணிகளை தொடங்க வேண்டும்: வர்த்தக தொழிற்குழுமம் கோரிக்கை

புயல் சீற்றப் பாதிப்பைக் கருத்தில் கொண்டு, நாகைக்கு ஏற்கெனவே அறிவித்த, புதைவட மின் விநியோகத் திட்டப் பணிகளை அரசு விரைந்து தொடங்க வேண்டும் என, நாகை இந்திய வர்த்தகத் தொழிற்குழுமம் கோரிக்கை விடுத்துள்ளது.
நாகை, இந்திய வர்த்தக தொழிற்குழும செயற்குழுக் கூட்டம், நாகையில் அண்மையில் நடைபெற்றது. சங்கத்தின் தலைவர் வி. ராமச்சந்திரன் தலைமை வகித்தார். செயலாளர் சுபாஷ்சந்திரன், துணைத் தலைவர் டி. மதியழகன், இணைச் செயலாளர் எஸ்.எம்.ஏ. கணேசன், பொருளாளர் எஸ். தர்மலிங்கம் ஆகியோர் முன்னிலை வகித்தனர்.
தீர்மானங்கள்: நாகை மாவட்டத் தலைமை அரசு மருத்துவமனையில் எம்.ஆர்.ஐ. ஸ்கேன் செயல்பாட்டுக்காக உயர் அழுத்த மின் மாற்றி அமைக்கவும், சிடி ஸ்கேன் மற்றும் எம்.ஆர்.ஐ. ஸ்கேன் பிரிவுக்கு உடனடியாக மருத்துவரை நியமிக்கவும் அரசு நடவடிக்கை எடுக்க வேண்டும்.
அக்கரைப்பேட்டை ரயில்வே மேம்பாலம் அமைப்புப் பணிகளை விரைந்து நிறைவேற்ற வேண்டும். 
நாகை பெரிய கடைத் தெருவில் தரைக்கடைகள் போக்குவரத்துக்கு இடையூறாக இருப்பதைக் கருத்தில் கொண்டு, ஆசாத் மார்க்கெட், பழைய அந்திக்கடை, நாகை பழையப் பேருந்து நிலையம் பகுதிகளில் தரைக்கடைகளுக்குத் தனி இடம் ஒதுக்க நகராட்சி நிர்வாகம் நடவடிக்கை எடுக்க வேண்டும். 
புயல் சீற்றம் போன்ற இயற்கைப் பேரிடர்களைக் கருத்தில் கொண்டு நாகை, நாகூர், வெளிப்பாளையம் ஆகிய பகுதிகளில் புதைவடம் மூலம் மின் விநியோகம் வழங்கும் திட்டம் செயல்படுத்தப்படும் என அரசு ஏற்கெனவே அறிவித்திருந்தது. 
ஆனால், அந்தத்  திட்டப்  பணிகள் ஏதும் தொடங்கப்படாமல் உள்ளன. எனவே, நாகையில் புதைவட மின் விநியோகத் திட்டப் பணிகளை விரைந்து செயல்படுத்த அரசு நடவடிக்கைகள் மேற்கொள்ள வேண்டும் உள்ளிட்ட தீர்மானங்கள் கூட்டத்தில் நிறைவேற்றப்பட்டன.