ரயில் பாதையை மாற்றும் பாய்ண்ட் கோளாறு: ஒரு மணி நேரம் போக்குவரத்து பாதிப்பு

கொரடாச்சேரி ரயில் நிலையம் பகுதியில், ரயில் தண்டவாளப்பாதையை மாற்றும் பாய்ண்டில் ஏற்பட்ட கோளாறு காரணமாக, ரயில்கள் ஒரு மணி நேரத்துக்கு தாமதமாக புறப்பட்டு சென்றது.
மன்னார்குடியிலிருந்து மயிலாடுதுறை வரை செல்லும் பயணிகள் ரயிலுக்காக நீடாமங்கலம் ரயில் நிலையத்தில், திங்கள்கிழமை காலை 8.50 மணிக்கு ரயில்கேட் மூடப்பட்டது. அந்தரயில் சரியாக 9 மணிக்கு நீடாமங்கலம் ரயில் நிலையத்துக்குள் வந்து நின்றது. நீண்டநேரமாக ரயில் புறப்படாததால், நீடாமங்கலம் நெடுஞ்சாலையில் இருபுறங்களிலும் பேருந்து, கார் உள்ளிட்ட வாகனங்கள் நீண்ட வரிசையில் நின்றது.
இந்நிலையில், ரயில்கள் புறப்படுவதில் ஏற்பட்ட தாமதத்துக்கு கொராடாச்சேரியில், ரயில் தண்டவாளப்பாதையை மாற்றி அமைக்கும் பாயிண்ட் மின்சார மோட்டார் இயங்காததால் சிக்னல் செயல்படவில்லை என்பதால்தான் என்பது தெரியவந்தது. ரயில்பாதை மாற்றும் பாய்ண்டில் ஏற்பட்ட பழுதை சரிசெய்ய நீண்டநேரம் பராமரிப்பு பணியாளர் முயன்றும், முடியாததால், கைப்பிடியைக் கொண்டு தண்டாவாளப்பாதையை மாற்றி சரி செய்யப்பட்டது.
இதற்கிடையில் பழுதான பாய்ண்ட் சரிசெய்யப்பட்டதையடுத்து, கொரடாச்சேரியில் நின்று கொண்டிருந்த காரைக்கால் - திருச்சி பயணிகள் ரயிலும், இதேபோல், திருச்சியிலிருந்து காரைக்கால் வரை செல்லும் பயணிகள் ரயில் அங்கிருந்து சுமார் ஒரு மணி நேரம் தாமதமாக புறப்பட்டு சென்றது. இதைத் தொடர்ந்து, நீடாமங்கலம் ரயில் நிலையத்தில் நின்று கொண்டிருந்த மன்னார்குடி - மயிலாடுதுறை பயணிகள் ரயில் 40 நிமிடம் தாமதமாக புறப்பட்டுச் சென்றது. இதேபோல், நீடாமங்கலத்தில் நின்று கொண்டிருந்த பேருந்து உள்ளிட்ட வாகனப் போக்குவரத்தும் 40 நிமிடத்துக்குப் பிறகு சீரானது.