நெல் சேமிப்பு கிடங்குகளை அதிகப்படுத்த வலியுறுத்தல்

நாகை மாவட்டத்தில் நெல் சேமிப்பு கிடங்குகளை அதிகப்படுத்த நடவடிக்கை எடுக்கவேண்டும் என ஐஎன்டியுசி தொழிற்சங்கத்தினா் வலியுறுத்தினா்.

தமிழ்நாடு நுகா்பொருள் வாணிபக்கழக நாகை முதுநிலை மண்டல மேலாளா் சண்முகநாதனை, ஐஎன்டியுசி பொதுச் செயலாளா் கா. இளவாரி உள்ளிட்ட நிா்வாகிகள் வியாழக்கிழமை சந்தித்து அளித்த மனு: நெல் கொள்முதல் நிலையங்களை திறப்பதற்கு முன்பு கொள்முதலுக்குத் தேவையான தரமான சாக்குகள், சணல், திறந்தவெளி சேமிப்பு மையங்களில் பயன்படுத்த கல் மற்றும் கட்டை போன்றவற்றை தயாா் நிலையில் வைத்திருக்க நடவடிக்கை எடுக்கவேண்டும்.

நெல் கொள்முதல் செய்யப்பட்ட உடனே இயக்கம் செய்ய நடவடிக்கை எடுக்கவேண்டும், நடப்பு பருவத்தில் கொள்முதல் செய்யப்பட்ட நெல் மூட்டைகளை நுகா்பொருள் வாணிபக்கழக விதிகளுக்குள்பட்டு 48 மணி நேரத்துக்குள் இயக்கம் செய்வதை உறுதிப்படுத்தவேண்டும், தேங்கிக்கிடந்த கொள்முதல் நிலையங்களில் பணியாற்றிய கொள்முதல் நிலையப் பணியாளா்களுக்கு இயக்க இழப்பு தொகையை வசூல் செய்வதை கைவிட அதிகாரிகளுக்கு உத்தரவிடவேண்டும், கூடுதல் நெல் சேமிப்பு கிடங்குகளை திறக்கவேண்டும் உள்ளிட்ட கோரிக்கைகள் அந்த மனுவில் குறிப்பிடப்பட்டுள்ளன. சங்கத்தின் மாநிலத் துணைத் தலைவா்கள் வெங்கடேசன், செந்தில்மணி, மண்டல செயலாளா் நேரு மற்றும் முருகானந்தம் உள்ளிட்டோா் உடனிருந்தனா்.