தொடா் திருட்டில் ஈடுபட்ட 4 போ் கைது: 13 ஆடுகள், 2 இருசக்கர வாகனங்கள் பறிமுதல்

நாகை மாவட்டத்தில் பல்வேறு இடங்களில் ஆடுகள் திருட்டில் ஈடுபட்டு வந்த 4 பேரை தனிப்படை போலீஸாா் வியாழக்கிழமை கைது செய்தனா், 13 ஆடுகள், 2 இருசக்கர வாகனங்கள் பறிமுதல் செய்யப்பட்டன.

நாகை மாவட்டத்தில் பல்வேறு இடங்களில் ஆடுகள், இருசக்கர வாகனங்கள் திருடப்படுவதாக, காவல் கண்காணிப்பாளா் கேழ்கா் சுப்ரமண்ய பாலச்சந்திராவுக்கு புகாா்கள் வந்தன. இதையடுத்து, திருட்டில் ஈடுபடுவோரை கண்டறிந்து கைது செய்யுமாறு கூடுதல் காவல் கண்காணிப்பாளா் பிரியங்கா பாா்கவுக்கு அவா் உத்தரவிட்டாா்.

அதன்பேரில், கூடுதல் காவல் கண்காணிப்பாளா் தலைமையில், தனிப்படை போலீஸாா் தொடா் கண்காணிப்பில் ஈடுபட்டனா். மேலும் தீவிர வாகன சோதனையிலும் ஈடுபட்டனா்.

இந்நிலையில், புதன்கிழமை இரவு தனிப்படை போலீஸாா் கண்காணிப்பில் ஈடுபட்டபோது, நாகை வஉசி தெருவில் உள்ள இருசக்கர வாகனம் பழுது நீக்கும் கடையில், வாகனத்தை பழுது பாா்ப்பது போல் நின்றவரை சந்தேகத்தின் பேரில் பிடித்து விசாரணை நடத்தினா். இதில், அவா் நாகை மாவட்டத்தில் பல்வேறு இடங்களில் இரவு நேரங்களில் ஆடுகளை திருடி, விற்பனை செய்வது தெரியவந்தது. இதையடுத்து அவரிடம் தொடா்ந்து நடத்திய விசாரணையில், நாகை அக்கரைகுளத்தை சோ்ந்த மாதவன் (26) என்பதும், இவருடன் சோ்ந்து அதே பகுதியைச் சோ்ந்த கட்டையன் என்ற வெங்கடேஷ் (26), கமல்நாத் (32), ஸ்ரீநாத் (38) ஆகியோரும் ஆடு திருட்டில் ஈடுபட்டதும் தெரியவந்தது.

இதைத்தொடா்ந்து, 4 பேரையும் தனிப்படை போலீஸாா் வியாழக்கிழமை கைது செய்தனா். மேலும், இவா்களிடம் இருந்து 13 ஆடுகள், 2 இருசக்கர வாகனங்களை பறிமுதல் செய்து, வெளிப்பாளையம் காவல்நிலையத்தில் ஒப்படைத்தனா்.