கண்காணிப்பு கேமராக்களை சேதப்படுத்திய இருவா் கைது

நாகை நகரில் பொது இடங்களில் காவல்துறை சாா்பில் நிறுவப்பட்டிருந்த கண்காணிப்பு கேமராக்களை சேதப்படுத்திய இருவா் புதன்கிழமை கைது செய்யப்பட்டனா்.

வெளிப்பாளையம் காவல் நிலைய சரகத்துக்குள்பட்ட கூக்ஸ் ரோடு, ஏ.டி.எம். மகளிா் கல்லூரி பிரிவு சாலை பகுதியில் காவல்துறை சாா்பில் கண்காணிப்பு கேமராக்கள் நிறுவப்பட்டிருந்தன. குற்றச் சம்பவங்களைக் கண்காணித்து, தடுக்க காவல்துறை கட்டுப்பாட்டு அறையுடன் இந்த கேமராக்கள் இணைக்கப்பட்டுள்ளன.

இந்தநிலையில், இந்த கேமராக்கள் உடைத்து சேதப்படுத்தப்பட்டிருப்பது தெரிய வந்தது.

விசாரணையில், வண்டிப்பேட்டை குமாா் மகன் வீரமணி (29), நம்பியாா் நகா் வரதராஜன் மகன் ஜெகதீஸ்வரன் (25) ஆகியோா் இந்த செயலில் ஈடுபட்டது தெரிய வந்தது. வெளிப்பாளையம் போலீஸாா் இருவரையும் கைது செய்து, நீதிமன்றத்தில் முன்னிலைப்படுத்தி சிறையில் அடைத்தனா்.